Корисниците на ЧетГПТ се фрустрирани од неодамнешните случаи во кои популарната вештачка интелигенција одбива задачи или им сугерира на корисниците сами да ја завршат работата, што ја натера „ОпенАИ“ да започне истрага. Компанијата „ОпенАИ“ ги потврди извештаите за ЧетГПТ што покажува некарактеристично однесување од нивниот популарен четбот со вештачка интелигенција.
– Не сме го ажурирале моделот од 11 ноември, а тоа секако не е намерно. Однесувањето на моделот може да биде непредвидливо и се обидуваме да го поправиме – велат од „ОпенАИ“.
ЧетГПТ, познат по тоа што им помага на корисниците со различни задачи, собра 1,7 милијарда корисници од неговото лансирање во ноември 2022 година, при што првичните истражувања во тоа време укажуваа на зголемена ефикасност и подобрен квалитет на работата, пишува „Бизнис инсајдер“.
Меѓутоа, корисниците сега пријавуваат случаи во кои тој паметен бот дава бескорисни одговори. Барањето на еден корисник за список со денови до 5 мај беше одбиено со тврдење дека не може да обезбеди „исцрпна листа“. Дискусиите на Редит откриваат дека корисниците се борат со реакцијата на ЧетГПТ на задачите и падот на квалитетот на одговорот, особено кога станува збор за пишување код.
И покрај тоа што претходно им го припишуваше проблемот на софтверски грешки, „ОпенАИ“ ја нагласува тековната истрага за поплаките на корисниците. Во соопштението компанијата забележува варијабилност во моделите за обука за разговор, што доведува до разлики во личноста, стилот на пишување, однесувањето на одбивање, па дури и политичка пристрасност.
Иако „ОпенАИ“ не одговори веднаш на медиумските прашања, корисниците бараат решенија, а некои сугерираат враќање на оригиналните ГПТ-модели. Компанијата ја нагласува сложеноста на моделот за обука на својот четбот со вештачка интелигенција и ги признава предизвиците за постигнување доследно однесување во различни циклуси на обука.
