Северна Кореја ја зајакна својата политика за развој на нуклеарно оружје преку уставни амандмани, а врховниот лидер Ким Џонг-ун вети дека ќе го забрза производството на нуклеарно оружје за да спречи „американски провокации“, објавија државните медиуми, а пренесе „Ројтерс“.
Врховното народно собрание едногласно ги усвои амандманите на Уставот, во кои се наведува дека Северна Кореја „развива моќно нуклеарно оружје за да го обезбеди“ своето „право да постои“ и да ја „одврати војната“, објави новинската агенција КЦНА, по завршувањето на дводневен состанок на парламентот.
– Политиката на градење на севернокорејските нуклеарни сили стана постојана како основен закон на земјата, кој никој не смее да не го почитува – рече Ким додека се обрати пред парламентот, објави „Танјуг“, цитирајќи го „Ројтерс“.
Тој ја нагласи „потребата да се продолжи со работа на експоненцијално зајакнување на производството на нуклеарно оружје и развој на средства за нуклеарен напад и нивно распоредување во различни служби“.
Тој рече дека американските воени вежби и распоредувањето на стратешки средства во регионот се екстремни провокации.
Ким ги повика властите понатаму да развијат солидарност со земјите кои се борат против САД, осудувајќи ја трилатералната соработка на САД, Јужна Кореја и Јапонија како „азиска верзија на НАТО“.
Во Јужна Кореја, Министерството за обединување рече дека уставните промени ја покажуваат „силната решеност“ на Пјонгјанг да не се откаже од својата нуклеарна програма.
Уставниот амандман доаѓа една година откако Северна Кореја законски го официјализираше правото да користи превентивни нуклеарни напади за да се заштити себеси, потег што го најави Ким ќе го направи нејзиниот нуклеарен статус „неповратен“.
