Советот на ЕУ денеска ги одобри новите санкции против Русија, кои првично беа одобрени во завчера, изјави високиот претставник на ЕУ за надворешна политика и безбедност, Жозеп Борел. На листата на санкционирани е додаден и рускиот министер за одбрана.
Во соопштението беа претставени детали за содржината на санкциите, кои предвидуваат дополнително ограничување на пристапот на Русија до воената технологија, вклучително и беспилотни летала и нивни делови, и додавање на уште 106 лица и 88 организации на списоците со санкции. Така, бројот на вклучените во списокот достигнува над 2.000, се наведува во соопштението.
Новите санкции влијаат на над 140 компании и вработени во рускиот воено-индустриски комплекс и учесници во снабдувањето со севернокорејско оружје за Русија. Вклучени се компании и граѓани на Белорусија кои ги поддржуваат руските вооружени сили. Наметнати се и мерки против службениците во украинските региони окупирани од Русија и одговорните за депортацијата на украинските деца.
Како што е наведено, новиот пакет санкции на Европската унија има за цел „да го ограничи пристапот на Русија“ до делови за беспилотни летала.
„Денешната одлука ја проширува листата на забранети стоки кои можат да придонесат за технолошкиот развој на рускиот одбранбен и безбедносен сектор, вклучувајќи компоненти за развој и производство на беспилотни летала“, се наведува во текстот.
Новиот пакет санкции официјално ќе стапи во сила по објавувањето во Службениот весник на ЕУ.
