Главната порака на делото е – деца бидете љубопитни за нови знаења, родители – поттикнете ги децата да бидат љубопитни. Светот со сите свои мани, недостатоци, неправди и лудости што му се случуваат, сепак е едно игриво и прекрасно место за живеење и творење, вели Магде Ангова
Нови книги: „Гатанки за сѐ и сешто и за уште нешто“ на Магде Ангова
„Гатанки за сѐ и сешто и за уште нешто“ од младата авторка Магде Ангова е разиграната илустрирана книга за деца, која ги актуализира и осовременува гатанките за новите генерации, Книгата, во издание на „Либи“, дел од „Арс ламина – публикации“, е збогатена со илустрации од Елена Давчева-Стојановска.
Промоторката на изданието, уредничката Оливера Ќорвезироска, на неодамнешната промоција истакна дека со досетлив, лирски избор на заглавните зборови – решенија на гатанките, и со опуштен, врзан стих со рима, Магде Ангова создала интересен поетски свет за видливите и невидливите нешта што децата треба само да ги препознаат или допрва да ги научат. Забавата и знаењето во оваа збирка се фатени рака за рака.
Ангова почнала да смислува гатанки за да ја анимира својата ќерка за време на карантинот, а инспирацијата за својата прва книга ја добила навраќајќи се кон гатанките од Видое Подгорец.
– Идејата за книгата настана сосема спонтано. Бев во Дојран кај моите родители на гости и во семејната библиотека ја најдов книгата со гатанки „Сто сонца“ од Видое Подгорец, која ја добив кога бев прво одделение. Веќе беше почнат карантинот и бев ослободена од работни обврски за да се грижам за мојата, тогаш петгодишна, ќерка. Знаев дека тоа ќе биде долг, неизвесен период полн со предизвици. Затоа решив да создадам нешто оригинално, нешто како гатанките на Видое Подгорец. Искрено, кога ги создавав гатанките одев, размислував, зборував и сонував во рима. Досега се покажа дека книгата е популарна кај децата, ја сакаат, ги читаат гатанките и најчесто ми даваат сугестии да напишам гатанка за нешто што не е споменато во „Гатанки за сè и сешто и за уште нешто“ – вели таа.
Книгата на забавен и интересен начин го отсликува светот околу нас. Многу предмети, животни, растенија и личности што нѐ опкружуваат и се среќаваме со нив во секојдневниот живот се прикажани, опеани со необична и игрива рима. Со „Гатанки за сѐ и сешто и за уште нешто“ децата ќе се забавуваат, ќе научат многу интересни работи за светот што ги опкружува, а родителите, читајќи им ја книгата, ќе поминат квалитетно време со своите најмили.
– Инспирација наоѓам во природата, природните појави, секојдневието. Кога ја пишував книгата се случуваше цел ден да мислам на една гатанка и да барам совршена рима за неа. Во мислите создавав стихови, ги римував и практично така настана целата книга. Главната порака на делото е – деца бидете љубопитни за нови знаења, родители – поттикнете ги децата да бидат љубопитни. Светот со сите свои мани, недостатоци, неправди и лудости што му се случуваат, сепак е едно игриво и прекрасно место за живеење и творење. Треба само да ги прошириме видиците и да ѝ дадеме шанса на фантазијата, да сонуваме за големи нешта, а во меѓувреме да им се радуваме и на најмалите работи. Првенствено, книгата е наменета за деца, а мислам дека возрасните, читајќи ја, ќе се потсетат на детството, на наивноста, на оние мали слатки заборавени нешта – додава таа.
Посебен шарм на промоцијата даде шестгодишната ќерка на авторката, Илина, која интерпретираше дел од гатанките.
– Првиот филтер за гатанките беше ќерка ми и на почетокот книгата имаше наслов „Гатанки пишувани со (м)Илина“. Верувајте ми, проверено е, децата се најискрената, но и најстрога публика. Кај нив нема заобиколување, ако нешто не им се допаѓа веднаш го пренасочуваат вниманието и со тоа знаете дека напишаното нема да помине кај нив… Децата се непресушен извор на инспирација. Ќе продолжам да творам, создавајќи литература за деца, затоа што сметам дека во Македонија навистина има потреба од тоа – вели Ангова.
Магде Ангова e родена во 1987 година. Живее во Гевгелија, а работи во Општина Дојран, како личност за односи со јавноста. Таа е магистерка по медиуми и комуникации, а во моментов ја завршува и магистратурата по психологија. „Гатанки за сѐ и сешто и за уште нешто“ е нејзина прва книга.
Книгата веќе е достапна во сите книжарници на „Литература.мк“ и онлајн преку www.literatura.mk.
М.Т.
Размисли и кажи!
Ако во неа со целото срце се внесеш
може до солзи да се смееш или од страв да се тресеш.
Ако дозволиш вниманието да ти го земе,
ќе те однесе во друг свет, во друго време.
Штом се вљубиш во неа мир ќе немаш,
ќе бара постојано в раце да ја земаш.
Но, не грижи се, тоа е слатка мака,
секој би требало неа да ја сака.
*****
(решение: книга)
Тој ги раскажува приказните на необичен начин,
знае да си игра со зборови, им додава некој магичен зачин.
Точките, запирките и другите интерпункциски знаци,
вешто ги протнува низ текстот, ко сонцето своите зраци.
Доколку е навистина талентиран, ќе ти направи кино в глава,
неговите дела можат да му донесат светска слава.
*****
(решение: писател)
Во многу книги за неа се пишува,
нема поет или писател што не ја возвишува.
Знае да е занесна, расеана, но и да пече и боли,
може да е горделива, понизна или за возвраќање да моли.
Ја има во повеќе видови, но нема облици или форми,
кога некој ја чувствува – заборава на правила и норми.
Знакот срце ја опишува,
не е позната сила неа што ја стишува.
*****
(решение: љубов)
(Извадоци од книгата „Гатанки за сѐ и сешто и за уште нешто“ од Магде Ангова, „Арс ламина“, Скопје, 2021)
