Министерството за надворешни работи, преку амбасадата на Бугарија во Скопје, упати вербална нота до бугарското Министерство за надворешни работи, по повод изјавите на пратеникот и лидер на политичката партија „Преродба“ Костадин Костадинов за време на конститутивната седница на Народно Собрание на Бугарија. Во нотата, како што наведуваат од МНР, се изразува крајно незадоволство од содржината на изјавата во која јавно се изразуваат иредентистички и територијални претензии кон Македонија.
– Го повторуваме апелот дека ваквите изјави се директно спротивни на интенцијата на двете држави го почитуваа и да го негуваат духот на Договорот за пријателство и добрососедство, во насока на создавање блиски и пријателски односи базирани на меѓусебна почит и соработка. Токму во духот на добрососедството, очекуваме релевантните политички и институционални фактори во Република Бугарија да се оградат и да ги осудат ваквите провокации и обиди за нарушување на добрососедските односи – се вели во соопштението од МНР.
Министерството претходно упати вербална нота поради неодамнешните јавни изјави на членот на Европскиот парламент и копретседател на бугарската партија ВМРО-БНД, Ангел Џамбаски.
