Премиерот Зоран Заев се сретна со Весли Кларк
Претседателот на Владата, Зоран Заев го прими поранешниот генерал на САД и поранешен командант на здружените сили на НАТО за Европа, Весли Кларк.
На средбата, на која присуствуваше и заменик-претседателот за борба против корупција, за одржлив развој и човечки ресурси, Љупчо Николовски, стана збор за новата реалност за Македонија и за регионот откако земјата и неколку други земји од Западен Балкан се членки на НАТО.
Премиерот Заев го истакна членството во НАТО како остварување на стратешката цел на земјата која го дефинираше геостратешкото место на Македонија во регионот и на меѓународен план, како и придобивките од безбедносната сигурност кои создадоа услови и поттикнаа голем број странски инвестиции и економски напредок.
Поранешниот генерал на САД и поранешен командант на здружените сили на НАТО за Европа, Весли Кларк истакна дека сега, откако заврши неговата војничка кариера, тој е целосно посветен како бизнисмен да го поддржува развојот на земјите од регионот и од југоисточна Европа во делот на нивното економско поврзување со инвеститори од САД и Европа, и особено во поддршката на владите во борба против корупцијата и сивата економија.
Како искусен познавач на регионот и на политиките за привлекување и поддршка на странските инвеститори на Македонија, поранешниот генерал Кларк на средбата истакна дека во наредниот период ќе го поттикнува интересот на компаниите од САД да инвестираат во нашата земја.
