Политички аналитичари и теолози вчера реагираа дека пописот не бил добро подготвен, дека е можно да е погрешно формулиран прашалникот за овој дел, но и дека попишувачи се бараа во последнот рок, па немаше време соодветно да се подготват
Резултатите од пописот што Државниот завод за статистика вчера ги објави, а се однесуваат на верската определба на граѓаните предизвикаа реакции на јавноста.
Во резултатите од пописот има графа „христијани“, за која според религиската припадност се изјасниле дека припаѓаат 242.579 граѓани. Јавноста останува збунета како е направена оваа припадност, дали и на која црква, верска заедница, или религиозна група припаѓаат оние кои се определиле само како „христијани“.
Со оглед на тоа што се работи за голема група од 242.579 лица кои се изјасниле како „христијани“, проверивме во Комисијата за верски заедници и религиозни групи. Оваа институција ги евидентира сите цркви, верски заедници и религиозни групи кои се регистрирани во земјава. Таква верска заедница во Македонија нема регистрирано.
Според Законот за правна положба на црква, верска заедница и религиозна група,
црква, верска заедница и религиозна група е доброволна заедница на физички лица кои со своето верско убедување и изворите на нивното учење ја остваруваат слободата на вероисповедта соединети по вера и идентитет изразен со подеднакво извршување на богослужба, молитва, обреди и друго изразување на верата.
Инаку, христијанството е религиска определба, а на пример „православен христијанин“, „католик“ или „христијанин протестант“, „протестант“, „баптист“, „адвентист“ е верска определба.
За да се разјасни за што станува збор, „Нова Македонија“ се обиде да добие објаснување од Државен завод за статистика околу подготовката на прашалниците за пописот и обуката на попишувачите. Штом ќе го добиеме, веднаш ќе го објавиме.
Политички аналитичари и теолози вчера реагираа дека пописот не бил добро подготвен, дека е можно да е погрешно формулиран прашалникот за овој дел, но и дека попишувачи се бараа во последнот рок, па немаше време соодветно да се подготват.
На веб-страницата на Комисијата за односи со верските заедници и религиозни групи е објавен преглед на сите регистрирани цркви, верски заедници и религиозни групи во земјата:
Регистрирани цркви:
1. МАКЕДОНСКА ПРАВОСЛАВНА ЦРКВА – ОХРИДСКА АРХИЕПИСКОПИЈА
2. КАТОЛИЧКА ЦРКВА ВО РЕПУБЛИКА МАКЕДОНИЈА
3. ЕВАНГЕЛСКО-МЕТОДИСТИЧКА ЦРКВА ВО МАКЕДОНИЈА
4. ХРИСТИЈАНСКА АДВЕНТИСТИЧКА ЦРКВА (ЦРКВА НА АДВЕНТИСТИТЕ НА СЕДМИОТ ДЕН) ВО РЕПУБЛИКА МАКЕДОНИЈА
5. ХРИСТИЈАНСКА АДВЕНТИСТИЧКА ЦРКВА ВО МАКЕДОНИЈА
6. ХРИСТИЈАНСКА БАПТИСТИЧКА ЦРКВА “РАДОСНА ВЕСТ“
7.ЕВАНГЕЛСКА СОБОРНА ЦРКВА
8. НОВОАПОСТОЛСКА ЦРКВА ВО МАКЕДОНИЈА
9. ЕВАНГЕЛСКА ЦРКВА ВО МАКЕДОНИЈА
10. ХРИСТИЈАНСКИ ЦЕНТАР ВО РЕПУБЛИКА МАКЕДОНИЈА
11. ЦРКВА БОЖЈА ВО РЕПУБЛИКА МАКЕДОНИЈА
12. ХРИСТИЈАНСКА ЦРКВА БОЖЈИ ГЛАС
13. ХРИСТИЈАНСКА ЦРКВА БЛАГА ВЕСТ ВО РМ
14. АПОСТОЛСКА РЕФОРМИРАНА ЦРКВА ВО РМ
15. ЦРКВА НА ИСУС ХРИСТОС НА СВЕТЦИТЕ ОД ПОДОЦНЕЖНИ ДНИ ВО МАКЕДОНИЈА
16. ЕВАНГЕЛСКО ПРОТЕСТАНТСКА ЦРКВА ГЛАСНОСТ
17. СКИЕНТОЛОШКА ЦРКВА ВО МАКЕДОНИЈА
18. ЦРКВА „ЕВАНГЕЛИЕ ХРИСТОВО“ – ЦЕХ
19. ХРИСТИЈАНСКА ЦРКВА „СИЛОАМ“
Регистрирани верски заедници:
1. ИСЛАМСКА ВЕРСКА ЗАЕДНИЦА НА РЕПУБЛИКА МАКЕДОНИЈА
2. ЕВРЕЈСКА ЗАЕДНИЦА ВО РЕПУБЛИКА МАКЕДОНИЈА
3.ЈЕХОВИНИ СВЕДОЦИ – ХРИСТИЈАНСКА ВЕРСКА ЗАЕДНИЦА
4.СВЕТА СТОЛИЦА – НА СУФИСКИТЕ ЕРЕНЛЕРИ НА СВЕТОТ ВО МАКЕДОНИЈА
5. ВАИШНАВСКА ВЕРСКА ЗАЕДНИЦА
6. ПРАХРИСТИЈАНСКА ЗАЕДНИЦА „УНИВЕРЗАЛЕН ЖИВОТ“
7. ВЕРСКА ЗАЕДНИЦА НА ПРАВОСЛАВНИ АЛБАНЦИ ВО РЕПУБЛИКА МАКЕДОНИЈА
8. ХРИСТИЈАНСКА ЗАЕДНИЦА ТРИНИТАС
9. Бекташиска верска заедница – БВЗ со седиште во „Хадр Баба Теќе“
10. ИСЛАМСКА СЕЛЕФИСКА ЗАЕДНИЦА „ДАР ЕЛ ХАДИС“
Регистрирани религиозни групи:
1. ХРИСТИЈАНСКА ЦРКВА „СЛОВО НА НАДЕЖ“
2. РЕФОРМНО ДВИЖЕЊЕ НА АДВЕНТИСТИТЕ НА СЕДМИОТ ДЕН
3.ХРИСТИЈАНСКО ДВИЖЕЊЕ „НОВА НАДЕЖ“
4. КАДЕРИСКА РЕЛИГИОЗНА ГРУПА „ЏЕННЕТ“
5. СЛОБОДНА ЕВАНГЕЛСКА ЦРКВА „ДОБРА ВЕСТ“
6. ЕХЛИБЕЈТСКА БЕКТАШИСКА РЕЛИГИОЗНА ГРУПА НА МАКЕДОНИЈА
7. ХРИСТИЈАНСКА ЦРКВА ОАЗА ВО РМ
8. ЕХЛИ СУННЕТ ВЕЛ ЏЕМАТ (ТРИЗЛА ЏАМИЈА)
9. РЕЛИГИОЗНА ГРУПА ДОМ НА МОЛИТВА
10. ТАРИКАТСКА РЕЛИГИОЗНА ГРУПА СУФИ СО СЕДИШТЕ ВО ТЕЌЕ
11. БАШКСИА Е ЕХЛИ СУНЕТИТ Е ЏЕМАТИТ – КУМАНОВО
12. КАДЕРИСКА БЕДЕВИСКА РЕЛИГИОЗНА ГРУПА ЗАКИРИЈЕ – КУМАНОВО
13. СЛОБОДНА ЕВАНГЕЛСКА ЦРКВА БОГ СО НАС – СКОПЈЕ
МПЦ апелираше за овој проблем?
Македонската православна црква-Охридска Архиепископија преку соопштение објавено на 13 септември 2022 година ги повика сите православни христијани, при пописот на населението, да ја искористат можноста, во делот за религиозна припадност, да се изјаснат како православни христијани, бидејќи таа опција постои во методологијата за попишување, а попишувачите се обврзани таквата определба да ја заведат при пописот.
– Православен христијанин – е јасна и недвосмислена идентитеска определба на сите кои ѝ припаѓаат на Светата Православна Црква. Истовремено ваквото изјаснување на македонските граѓани е и остварување на основните верски слободи и права во македонското општество-пишува во соопштението на Синодот на МПЦ-ОА, објавен на веб-страницата на МПЦ-ОА.
