Европската комисија (ЕК) сè уште не понудила решение за укинување на ограничувањето на престојот на професионалните возачи на камиони од Западен Балкан во земјите од Шенген-зоната и поради тоа претставниците на превозниците од Босна и Херцеговина, Црна Гора, Македонија и Србија на 11 август ќе одржат регионален состанок во Македонија, на кој ќе ги разгледаат натамошните чекори.
Претседателот на Здружението за меѓународен транспорт на Србија, Неѓо Мандиќ, за агенцијата Бета изјавил дека состанокот со надлежниот директорат на Европската Унија, на кој треба да се разговара за изземање на возачите во меѓународниот транспорт од правилото според кое престојот во Шенген-зоната е ограничен на 90 дена во период од 180 дена, би требало да се одржи кон крајот на следната недела.
Мандиќ вели дека здруженијата на превозници од Србија, Босна и Херцеговина, Црна Гора и Северна Македонија испратиле писмо до Европската Унија и побарале средба, предлагајќи таа да се одржи во Белград или во Брисел, но најверојатно ќе биде организирана онлајн, што, според него, не е соодветен формат за вакви разговори.
Тој додаде дека тројца надлежни директори од Директоратот на ЕУ за мобилност и транспорт се на одмор до 12 август, поради што разговорите се очекува да се одржат по тој датум.
– Возачите кои ќе бидат затекнати во Шенген-зоната и натаму се депортираат, а камионите се задржуваат, и покрај договорот од 10 април годинава со кој беше предвидено деновите поминати во Шенген до тој датум да се избришат и да започне ново броење. Возачите кои веќе ја исполниле квотата од 90 дена во последните шест месеци и понатаму не можат да влезат во Хрватска, Унгарија или Романија – вели Мандиќ.
Тој додаде дека од воведувањето на правилото 90/180 во октомври 2025 година, кое се применува за престојот на превозниците во земјите од Шенген-зоната – која, покрај државите од ЕУ, ги опфаќа и Исланд, Норвешка, Швајцарија, Лихтенштајн, Монако, Сан Марино и Ватикан – ништо не е променето за да им се овозможи на превозниците непречено да вршат меѓународен транспорт.
На крајот на јануари годинава превозниците од Србија и Босна и Херцеговина четири дена ги блокираа товарните терминали на граничните премини, но не беше најдено решение тие да бидат изземени од ограничувањето за престој во земјите од Шенгенскиот договор.
Правилото 90/180 Европската Унија го воведе со цел да го спречи неконтролираниот прилив на мигранти, при што статусот на професионалните возачи во меѓународниот транспорт беше изедначен со статусот на туристите.
По последната средба на превозниците од Западен Балкан, меѓународните транспортни компании ѝ предложија на Европската комисија до 10 август 2026 година да се изјасни како ќе го реши проблемот со овие возачи, но не добија одговор.
