Бугарите ги донесоа ветените агрегати за струја на преминот „Деве Баир“, а МВР им ги врати назад, објави „Макфакс“. Ова пак, беше повод за бугарскиот европратеник Ангел Џамбаски одново да упати критики за Македонија и да обвинува за сеење омраза. Агрегаторите беа ветени од бугарскиот вицепремиер за јавен ред и безбедност и министер за внатрешни работи Иван Демерџиев, но не се знае дали тој ги испратил. Од македонското МВР велат дека можат да ги земат агрегаторите само со соодветна документација.
– Согласно законските прописи без договор за донација институцијата не може нит да прими нит да предаде донација – велат од МВР.
Европратеникот Ангел Џамбаски ги обвини македонските гранични власти на преминот Деве Баир дека одбиле да ги примат агрегатите за струја.
– Не е никакво изненадување, бугарските хејтери во Скопје се ќе направат против Бугарија. Инаку вака блеска нивната лага. Тие самите докажаа дека причината за кршењето на правата на стотици Бугари за слободно движење не е немањето струја, туку омразата на властите во Скопје кон Бугарија и Бугарите – напиша Џамбаски на Фејсбук.
Најавата за агрегати од бугарските власти уследи по паѓањето на системот за контрола на граничниот премин Деве Баир на 4 февруари, со кој се регулира влегување и излегување во земјава. Бугарите тргнати да го чествуваат Гоце Делчев останаа заглавени на граница неколку часа поради паднатиот систем.
