Рускиот претседател Владимир Путин пристигна на космодромот Восточни во руската област Амур каде што го пречека севернокорејскиот лидер Ким Јонг-ун, кој од вчера е во посета на Русија на покана на рускиот претседател.
Путин ја објави својата намера да го посети космодромот за време на пленарната сесија на Источниот економски форум во Владивосток. Сепак, тој одби да ја открие целта на неговото патување.
– Јас имам своја агенда таму, кога ќе стигнам таму, ќе знаете – рече рускиот претседател.
Ким Јонг-ун вчера пристигна во Русија со оклопен воз кој тргна од Пјонгјанг во неделата вечерта. Тој беше пречекан на станицата Хасан во Приморски крај од Александар Козлов, претседател на меѓувладината комисија Русија-Северна Кореја и министер за природни ресурси и животна средина.
Ова е прва посета на Ким во странство по пандемијата на ковид-19. Последен пат се сретна со Путин во 2019 година во Владивосток.
