Кина се обидува да ја доближи археологијата до јавноста преку нов петгодишен план во кој се утврдени приоритетите за истражување, меѓународна соработка и пошироко претставување на археолошките откритија. Во моментов Кина располага со 65 национални парка на археолошки локалитети, кои сè повеќе стануваат дестинации за посетители. Бројот на посети на овие паркови пораснал од 20,97 милиони во 2021 година на 97,74 милиони во 2025 година, достигнувајќи вкупно 303 милиони посети во текот на овој петгодишен период.
Во Националниот парк на археолошки локалитети „Дахецун“, кој се наоѓа во Џенгџоу (провинција Хенан, централна Кина), изграден е музеј што е главно сместен под земја. Во него се изложени повеќе од 1.500 артефакти што ја прикажуваат историјата на неолитска населба, стара околу 7.000 години. Во градот Луојанг, исто така во провинцијата Хенан, неколку значајни археолошки локалитети од различни историски периоди станаа културни обележја, вткаени во современиот градски пејзаж.
– Археолошката дејност се трансформира од тесно специјализирана област кон пошироко вклучување на јавноста – изјави Џанг Леи, раководител на одделот за археологија при Националната управа за културно наследство (НЦХА).
Кина ќе продолжи со реализација на Проектот за потеклото на кинеската цивилизација, како и со други значајни потфати во рамките на Програмата за кинеска археологија, при што истражувањата ќе бидат насочени кон потеклото на цивилизацијата и формирањето на раните држави.
Археолошките истражувања ќе се интензивираат на клучните локалитети, меѓу кои се Ерлитоу, урнатините Јин и Сансингдуи. Планот, исто така, опфаќа истражувања за развојот на цивилизацијата по должината на реката Јангце, дополнителни проучувања за потеклото и еволуцијата на луѓето во Источна Азија, како и зголемени археолошки активности насочени кон поморското културно наследство во Јужнокинеско и Источнокинеско Море.
Меѓународната соработка претставува уште еден приоритет. Кина планира да спроведе заеднички археолошки проекти со странски партнери, со посебен фокус на земјите вклучени во иницијативата „Појас и пат“, како и да развие од пет до десет модел-проекти за кинеско-странска археолошка соработка. Планот, исто така, предвидува поблиска соработка помеѓу археологијата и природните, хуманистичките и општествените науки. Обуката на следната генерација археолози ќе биде од суштинско значење за овие напори.
Целта е да се обезбеди археолошките откритија да придонесат за јавното знаење за историјата и културното наследство, како и за академското разбирање на минатото на Кина.
