Претседателката Гордана Силјановска-Давкова ѝ ја честиташе победата на Илијана Јотова, која победи вчера на претседателските избори во Бугарија.
– Во име на македонските граѓани и од мое лично име им ја честитам изборната победа на претседателката Илијана Јотова и потпретседателот Кирил В’лчев. Успехот на претседателката Јотова ја одразува волјата на бугарскиот народ. Уверена сум дека за време на нејзиниот мандат, Бугарија ќе одигра конструктивна улога во нашиот регион и во Европа – напиша претседателката на мрежата „Х“.
Претседателката изрази уверување дека ќе ја продолжат меѓусебната соработка со меѓусебна почит, отворен дијалог и искрено партнерство.
– Со добра волја можеме да ги надминеме постоечките предизвици, да ги зајакнеме македонско-бугарските односи и да го унапредиме мирот, стабилноста и просперитетот – додава Силјановска-Давкова во објавата.
Кандидатската двојка Илијана Јотова и Кирил В’лчев вчера победи на изборите за претседател и потпретседател на Бугарија со 57,58 отсто од гласовите, додека Андреј Ѓуров и Георги Кандев добија 39,47 проценти.
