Едноставни постапки ја намалуваат зимската потрошувачка на струја
- Неколку едноставни навики можат да ја намалат зимската потрошувачка на електрична енергија без да се жртвуваат топлината и удобноста во домот
Со доаѓањето на студените денови, сметките за електрична енергија стануваат сериозен товар за многу семејства. Дополнителното загревање на просториите, подолгото користење на грејните уреди и топлината што се губи низ лошо изолираните прозорци директно се одразуваат врз домашниот буџет. Но со неколку практични промени во секојдневното однесување, можно е да се заштеди струја без домот да стане постудено и понепријатно место.
Греењето е најважната точка
Првиот чекор е рационално користење на грејните уреди. Домаќинствата што користат термоакумулациски печки треба, кога го овозможува тоа тарифниот систем, да ги полнат во периодите со поевтина електрична енергија. Така топлината се складира и се користи во текот на денот, кога е најпотребна. Кај клима-уредите, препораката е да се избере умерена и стабилна температура наместо просторијата постојано да се загрева на највисоко ниво. Редовното чистење на филтрите и правилното одржување придонесуваат за поефикасна работа. Важно е и грејниот уред да одговара на големината и изолацијата на просторијата.
Не дозволувајте топлината да излегува надвор
Нема голема корист од греењето ако топлината постојано се губи низ прозорците и вратите. Затоа, пред зимата треба да се проверат дихтунзите, шарките и затворањето на прозорците. Едноставните изолациски ленти можат да помогнат во спречувањето на пробивот на студен воздух. Каде што е соодветно, може да се разгледа и поставување термоизолациска фолија на стаклата. Сепак, најдобро е решението да се избере според видот на прозорците и реалните потреби на домот.
Проветрувајте паметно, кусо но темелно
Во зима не е добро прозорците да остануваат подолго отворени додека греењето работи. Подобро е просторијата да се проветри кратко и интензивно, а потоа прозорците да се затворат. Така се менува воздухот, без непотребно ладење на ѕидовите и мебелот. Исто така, вратите кон просториите што не се користат може да се држат затворени, а греењето да се приспособи на реалните потреби на членовите на семејството.
Малите навики носат голема разлика
Штедењето не значи откажување од основниот комфор, туку избегнување непотребна потрошувачка. Исклучувањето на светилките во празните простории, користењето енергетски ефикасни светилки и целосното исклучување на уредите што не се користат можат дополнително да придонесат за помала сметка. Корисно е и секој месец да се споредува потрошувачката со претходните месеци. Така полесно ќе се открие кои навики и уреди создаваат најголем трошок.
Потребни се и системски решенија
Одговорноста за енергетската ефикасност не треба да остане само на граѓаните. Потребни се подостапни програми за изолација на домовите, поддршка за замена на неефикасните грејни уреди и јасни информации за тарифите и начините на заштеда. Посебна помош треба да добијат пензионерите, социјално ранливите семејства и домаќинствата што живеат во енергетски неефикасни објекти. Зимската заштеда почнува со едноставни чекори, и тоа со правилно греење, добро затворени прозорци и разумно користење на електричната енергија. Но вистинскиот напредок бара и долгорочни инвестиции во енергетски ефикасни домови.
Препораката е дека не треба да се штеди на здравјето и потребната топлина, туку на непотребното трошење. Секој заштеден киловат-час е помал трошок за семејството и помало оптоварување за енергетскиот систем. Р.М.
