Законот за јавно-приватно партнерство треба да претрпи измени со цел да се поедностави неговата примена и да се зголеми правната сигурност на институциите, смета заменик-министерот за економија и труд, Марјан Ристески.
Според него, актуелното законско решение остава простор за проблеми при спроведувањето, вклучително и во однос на постапките на Државниот завод за ревизија и забелешките што произлегуваат од нив.
– Овој модел има особено значење за идните инвестиции во државата. Сметам дека законот треба да се преработи и да се направи поефикасен, така што институциите и сите што го применуваат да немаат страв или несигурност при неговото спроведување. Во Владата веќе работиме на ова прашање и се надевам дека на една од следните седници на Економско-социјалниот совет ќе го разгледаме Законот за јавно-приватно партнерство – изјави Ристески пред почетокот на тркалезната маса организирана од Сојузот на стопански комори.
Тој оценува дека јавно-приватното партнерство може да даде значајни резултати, какви што се постигнати во развиените западноевропски земји, доколку моделот соодветно се примени и во Македонија.
Од Сојузот на стопански комори сметаат дека јавно-приватното партнерство може да биде важен инструмент за развој на економијата и бизнисот, но и за надминување на проблемите со кои се соочуваат јавните претпријатија, особено оние што работат со загуби.
Претседателот на ССКМ, Горан Ѓорѓиевски, посочува дека преку соодветни модели на партнерство јавните претпријатија би можеле да привлечат дополнителен капитал, да ја модернизираат опремата и да го подобрат работењето, при што државата би можела да ја задржи доминантната сопственост.
– Приватниот сектор би вложувал капитал во развојот на јавните претпријатија, во набавка на современа техничка опрема, во унапредување на човечките ресурси, како и во доквалификација и преквалификација на вработените. На тој начин државата би добила поефикасни претпријатија, а дел од суштинските проблеми би се решавале преку приватните инвестиции и експертиза – вели Ѓорѓиевски.
Според него, целта е јавните претпријатија да станат профитабилни компании од кои корист ќе имаат сите засегнати страни. Притоа, ваквиот модел би овозможил и поголемо вклучување на домашниот капитал во развојот на компаниите и во интерес на државата.
ССКМ останува и на ставот дека треба да се разгледа можноста за премин на дел од вработените од јавниот во приватниот сектор, но нагласува дека станува збор за прашање што бара внимателна анализа и соодветни услови.
– Во дел од јавните претпријатија има голем број вработени, но не сите се соодветно ангажирани во работните процеси. Преку јавно-приватното партнерство би можело да се создаде простор за поефикасна организација на работата и за премин на дел од вработените кон приватниот сектор, доколку постојат соодветни услови – истакнува Ѓорѓиевски.
Тој додава дека приватните компании треба да бидат главни носители на економските активности, а зголемувањето на бројот на вработени во приватниот сектор треба да придонесе за поголема ефикасност и создавање нова вредност.
Ристески, пак, вели дека во последниот период се забележува премин на вработени од јавните институции и министерствата во приватниот сектор, што го оценува како позитивен тренд за македонската економија.
– Во западноевропските земји приватниот сектор често нуди повисоки плати од јавниот сектор. Ќе бидеме задоволни кога и кај нас приватниот сектор ќе стане попривлечен и поинтересен за вработување од јавниот сектор – рече Ристески.
