Владата ја продолжува мерката за намалување на данокот на додадена вредност (ДДВ) за дизелот од 18 на 10 отсто до 20 октомври 2026 година.
Министерката за финансии Гордана Димитриеска-Кочоска ја соопшти одлуката преку објава на својот Фејсбук-профил, наведувајќи дека целта е ублажување на ценовните притисоци врз домаќинствата и стопанството и зачувување на економската стабилност.
– Продолжуваме со мерките за заштита на стандардот на граѓаните и стабилноста на домашната економија. Владата ја продолжува мерката за намалување на ДДВ за дизелот од 18 на 10 отсто, до 20 октомври 2026 година. Со оваа мерка влијаеме врз малопродажните цени на горивата и ги ублажуваме надворешните ценовни притисоци, со цел да го намалиме финансискиот товар врз граѓаните и стопанството – напиша Димитриеска-Кочоска.
Министерката посочи дека надлежните институции продолжуваат внимателно да ги следат движењата на меѓународните пазари.
– Продолжуваме внимателно да ги следиме состојбите на меѓународните пазари и навремено да реагираме со мерки што придонесуваат за заштита на животниот стандард и економската стабилност – истакна таа.
