Во делови од Европа температурите вчера достигнаа 40 Целзиусови степени, додека други региони беа погодени од силни бури. Рекордната топлина ги преоптовари здравствените системи, го наруши сообраќајот и предизвика проблеми во производството и снабдувањето со електрична енергија низ континентот.
Околу илјада дополнителни смртни случаи поврзани со топлината се регистрирани во Франција, објави францускиот институт за јавно здравје „Санте публик Франс“. Повеќето од починатите се постари лица, соопшти институцијата, предупредувајќи дека бројот веројатно ќе се зголемува како што ќе пристигнуваат податоци од установите за нега и домовите.
Научниците велат дека топлотниот бран, кој почна на 20 јуни, е еден од најсилните досега забележани во Европа. Интензивната жештина предизвика прекини во производството на електрична енергија, оштетување на инфраструктурата и дополнителен притисок врз здравствените системи.
-Во овој момент, 150 милиони луѓе живеат во услови на екстремна топлина, стотици починаа, училиштата се затворени, а електричните мрежи се под огромен притисок – напиша генералниот директор на Светската здравствена организација, Тедрос Аданом Гебрејесус, на платформата Икс.
Тој предупреди дека, поради климатските промени и глобалното затоплување, топлотните бранови кои некогаш се сметале за „генерациски“ сега се случуваат речиси секоја година.
-Предупредени сме – напиша шефот на СЗО, додавајќи дека домовите, работните места и училиштата во Европа се слабо подготвени за екстремни температури.
Според научниците, ваков топлотен бран би бил „речиси невозможен“ без климатските промени предизвикани од човекот. Тие наведуваат дека високите ноќни температури оваа недела биле 100 пати поверојатни отколку пред само 20 години.
Температурни рекорди беа соборени во Австрија, Чешка, Германија и Полска, додека делови од Франција беа погодени од бури, што предизвика дополнителни прекини во сообраќајот и снабдувањето со електрична енергија.
Во Германија, железничкиот сообраќај беше намален на главна железничка линија во западната сојузна покраина Северна Рајна-Вестфалија, а трамвајските линии беа суспендирани во источниот град Лајпциг. Локалните медиуми јавија дека многу граѓани останале дома и избегнувале излегување пред зајдисонце.
Во Рим, папата Лав им се заблагодари на верниците кои присуствуваа на неделната молитва на плоштадот „Свети Петар“ и покрај неподносливата жештина.
Екстремната топлина влијаеше и врз европските реки, зголемувајќи ја температурата и намалувајќи го нивото на водата. Тоа предизвика проблеми во производството на електрична енергија и во земјоделството.
Унгарската влада вчера соопшти дека производството во нуклеарната централа „Пакш“ повторно е намалено поради високата температура на водата во Дунав, која се користи во системот за ладење на централата.
Во Италија, протокот на реката По е намален, поради што морска вода навлегла дури 18 километри во внатрешноста. Тоа ги зголеми стравувањата за последици врз земјоделството и заштитените мочуришта во делтата на реката.
Италијанските спасувачки екипи, пак, трагаат по сопругот на министерката Евгенија Рочела, кој исчезна во саботата додека пливал во езерото Вико, околу 70 километри од Рим.
Чешките власти ги повикаа граѓаните да избегнуваат физичка активност и издадоа предупредувања за смог во централните и северните делови на земјата, поради високите нивоа на приземен озон предизвикани од жештината.
Метеоролозите најавуваат дека во следните денови грмотевици би можеле да погодат делови од Франција, Германија и Чешка. Во поголемиот дел од Западна Европа оваа недела се очекува заладување, додека топлотниот бран ќе се придвижи кон Централна Европа и Балканот.
Францускиот метеоролошки институт соопшти дека екстремната топлина се намалила во поголемиот дел од Франција, но предупредувањата за високи температури сè уште важат за делови од североистокот на земјата.
Француската министерка за здравство Стефани Рист изјави дека последиците од топлотниот бран би можеле да се чувствуваат и до десет дена по смирувањето на жештината.
-Оваа епизода сè уште не е завршена – изјави Рист за BFM.
