Планирана тепачка меѓу млади луѓе ескалираше во масовно пукање во парк во Северна Каролина во понеделник наутро, во кое загинаа двајца тинејџери, а пет други лица беа повредени, соопштија властите.
Капетанот на полицијата во Винстон-Сејлем, Кевин Бернс, потврди дека 16-годишник и 17-годишник починале на местото на настанот откако биле застрелани околу 10 часот наутро во паркот Лајнбах, во близина на средно училиште. Пет други, на возраст од 14 до 19 години, се здобиле со повреди кои се движеле од критични до полесни, а четири од жртвите биле жени, изјави Бернс за време на прес-конференцијата, пренесе ТВ 13 Њус.
Властите објавија дека повеќе лица пукале од огнено оружје за време на инцидентот. Шефот на полицијата во Винстон-Сејлем, Вилијам Пен, изјави дека не се извршени апсења, но се верува дека некои од повредените можеби биле вклучени и во пукањето.
– Се чувствувам како и сите други. Фрустриран сум, лут сум, тажен сум. Ова не мораше да се случи“, изрази Пен.
Шефот на полицијата не можеше да потврди дали починатите тинејџери биле оние кои биле планирани да се тепаат и одби да коментира за мотивот зад планираната конфронтација.
Службениците ја уверија јавноста дека училиштата во близина на паркот остануваат безбедни по инцидентот.
Пукањето се случило во приградски парк лоциран северозападно од центарот на Винстон-Сејлем, град со приближно 250.000 жители, историски признат како дом на тутунската компанија „Р.Ј. Рејнолдс“.
