Се очекува следната ледена доба на Земјата да започне за приближно 11.000 години, освен ако глобалното затоплување предизвикано од човечка активност не ги наруши природните циклуси. Ова го покажала новата студија објавена во списанието „Сајенс“, која анализирала како суптилните промени во орбитата на Земјата околу Сонцето историски предизвикувале огромни климатски промени.
Меѓународен тим на истражувачи ги споредил промените забележани во климата на Земјата во последните милион години со ротацијата на сината планета околу Сонцето. Истражувајќи три параметри на оваа ротација – наклонетоста на оската на Земјата, нејзиното подвижно лулање и самата патека на орбитата, која е благо елиптична – тие воспоставиле совпаѓање.
– Успеавме да ја предвидиме секоја деглацијација во последните 900.000 години – изјави главниот автор Стивен Баркер, професор на Универзитетот во Кардиф.
На Земјата долго време се менувале глацијални периоди и потопли меѓуглацијални периоди. Последната санта мраз ја снемало пред околу 11.700 години.
– Идејата за врска помеѓу температурите и орбитата на Земјата не е нова. Научниците веќе мислеле дека климата на Земјата се менува врз основа на нејзината орбита, која циклично го менува количеството на сончева светлина. Но, ова е првпат да успееме да ги споиме овие три параметри заедно и да предвидиме кога ќе дојде до деглацијација – рече Баркер.
Коавторката Лорен Лисиеки, професорка на Универзитетот на Калифорнија во Санта Барбара, ја нагласи важноста на студијата, наведувајќи дека таа „потврдува дека природните циклуси на климатските промени што ги набљудуваме на Земјата во текот на десетици илјади години се во голема мера предвидливи и не се случајни или хаотични“. Баркер рече дека без индустриската револуција, со претпоставка дека фосилните горива никогаш не биле изгорени, „би очекувале глацијацијата да се случи за 11.000 години, а да заврши за 66.000 години“.
Истражувачкиот тим има цел да ги прошири своите откритија истражувајќи го долгорочниот ефект на климатските промени предизвикани од луѓето и како тие можат да го преобликуваат природниот климатски циклус на планетата.
