Иранскиот Врховен верски лидер, ајатолахот Али Хамнеи, денеска изјави дека Исламската Република нема да попушти пред протестите, а за немирите во земјата ги обвини „странските елементи кои се обидуваат да ја дестабилизираат земјата“.
-Секој треба да знае дека Исламската Република дојде на власт со крвта на стотици илјади чесни луѓе и дека нема да попушти пред саботерите – рече Хамнеи во обраќање на државната телевизија.
Зборувајќи за протестите во Техеран, тој рече дека демонстрантите протестираат за да го задоволат американскиот претседател.
-Тие сакаат да го направат среќен. Ако знаеше како да ја води земјата, ќе ја водеше својата. Рацете на американскиот претседател се извалкани со крвта на повеќе од 1.000 Иранци – рече Хамнеи, коментирајќи ги нападите на САД врз нуклеарните постројки на Иран во јуни.
Тој додаде дека има многу проблеми во рамките на САД, пренесува „Иран Интернешнл“.
Хамнеи ги повика поддржувачите да останат обединети.
-Драги млади луѓе, задржете ја вашата подготвеност и единство. Обединетата нација ќе го победи секој непријател – рече иранскиот верски лидер.
Протестите поради економските тешкотии денеска продолжија низ целиот Иран.
Групата за следење на интернет NetBlocks објави дека вчера во Иран имало прекин на интернетот, што траел до денеска.
Американската агенција HRANA објави дека за време на немирите биле убиени најмалку 34 демонстранти и четворица припадници на безбедносните сили, а дека биле уапсени 2.200 лица, што, според аналитичарите, укажува на подлабоко разочарување од моменталната ситуација.
Властите се обидоа да одржат двоен пристап кон немирите, велејќи дека економските протести се легитимни и нудат дијалог, додека на некои демонстрации одговараа со солзавец во насилни улични судири.
