Зависноста од паметни телефони натера некои луѓе да се свртат кон класични мобилни телефони, додека други избрале софтверско решение што го ограничува времето поминато на паметните телефони. Но група креативци што работат на платформата „Метер неуросајенс“ и се обидуваат да го решат проблемот со зависноста, се упатиле во сосема друга насока.
Тие дизајнирале посебна маска што на почетокот била замислена како шега меѓу нивните членови и носталгично потсетување на првите мобилни телефони, кои биле големи и тешки, па затоа потсетувале на тули. Сепак, се покажало дека тоа е одлична алатка за одвикнување од телефон. Имено, станува збор за посебна маска за паметен телефон направена од чист челик, со тежина од речиси три килограми. Корисниците можат да ја стават на телефонот по потреба и да ја извадат кога ќе им треба паметен телефон. Работата е во тоа што користењето на толку тежок, голем и масивен телефон е мошне напорно. Рацете многу брзо се заморуваат, а ако случајно го испуштите на нога или рака, може сериозно да се повредите.
Резултатот беше дека корисниците што биле тестирани брзо се откажале од користење на своите телефони и ги оставиле на маса. Покрај тоа, времето поминато во користење на телефонот речиси се преполовило затоа што користењето било заморно. Корисниците се откажале од гледање на омилените серии на телефоните и почесто ги оставале на маса, наместо да ги држат во рака и постојано да гледаат во нив. Секако, таквата маска не е за секого и не е евтина. Комерцијалната вредност на маската би била околу 400 долари, додека трошокот за нејзина производство (поради 3Д-печатење и челик) е поголем од 200 долари.
