Сиан – домаќин на Вториот форум за соработка на „Чајна релвеј експрес“
- Возовите на Кинеската железница реализирале речиси 120.000 патувања, создавајќи опсежна транспортна мрежа што поврзува 128 града во Кина со 232 града во 26 европски држави и повеќе од 100 града во 11 азиски земји. Овие статистики ги истакнуваат растот на ЦРЕ и нејзината суштинска улога во глобални рамки
Сиан, главниот град на северозападната кинеска провинција Шанси во Кина, неодамна беше домаќин на Вториот форум за соработка на „Чајна релвеј експрес“ (Кинеската брза железница). Овој значаен настан собра претставници од 145 компании од 20 земји и региони, кои имаат за цел унапредување на меѓународниот железнички транспорт, а тема на годинашниот форум беше „Поврзување на Азија и Европа за заедничка иднина“, преку која беше истакната суштинската улога на соработката во железничкиот сообраќај и поттикнувањето на економските врски помеѓу двата континента. Главен акцент на настанот беше ставен на различните иницијативи за соработка и презентација на иновативните транспортни решенија дизајнирани за обезбедување ефикасност, безбедност и диверзификација на железничките пруги. Беше спомената и иницијативата за склучување договор меѓу Кина и пет централноазиски земји што е насочен кон унапредување на кинеско-европската соработка во транспортот на стоки преку Кинеската железница. Оваа иницијатива го одразува зголемениот тренд за подлабока интеграција меѓу нациите. Освен што ги потенцираше постојните достигнувања во оваа сфера, форумот најави и нејзин иден развој.
Кина му придава големо значење на развојот на железничкиот сообраќај
Кинескиот вицепремиер Динг Ксуеџијанг, кој е член на Постојаниот комитет на Политбирото на Централниот комитет на Комунистичката партија на Кина, се обрати на церемонијата на отворањето на вториот Форум за соработка на Кинеската железница во Сиан. Тој рече дека Кина му придава големо значење на развојот на кинескиот железнички сообраќај, односно на кинеско-европските товарни железнички услуги. Динг забележа дека „Чајна релвеј експрес“ се развива во меѓународен логистички бренд со силно зрачење, движечка сила и влијание и најави дека на четвртата пленарна седница на 20. Централниот комитет на КПК е подготвен план за развојот на Кина во наредните пет години, во чии рамки спаѓа и развојот на Кинеската железница.
– Кина е подготвена да соработува со сите страни за да го зачува духот на Патот на свилата и активно да спроведува комуникација и соработка, со цел да се промовира развојот на Кина – рече тој.
Според Динг, потребно е да се зајакне меѓусебната поврзаност, да се продлабочи координацијата и да се зајакне усогласеноста на правилата и стандардите во железничкиот транспорт на стоки, да се зајакнат соработката и иновацијата, да се промовира примената на напредни и нови технологии и да се забрза развојот во дигитализацијата.
Цончо Ганев, потпретседател на Бугарското национално собрание, исто така се обрати на свеченото отворање. По отворањето, Динг се сретна со Ганев и двете страни разменија мислења за односите меѓу Кина и Бугарија и за билатералната соработка.
Форумот собра околу 450 учесници, вклучувајќи експерти, научници, претприемачи и владини функционери од земјата и странство, како и претставници на меѓународни организации.
Новата транспортна рута ги поврзува Џенџоу и Хамбург
„Чајна релвеј експрес“ ја објави четвртата фаза во развојот на железничките услуги, која сега вклучува седум нови рути. На пример, значајна нова рута ги поврзува Џенџоу во Кина и Хамбург во Германија, зголемувајќи го вкупниот број на рути на 17, со планирани над илјада годишни патувања.
Алексеј Лјахнович, министер за транспорт и комуникации на Белорусија, ги истакна придобивките од соработката со Кина – Железница експрес и посочи дека иницијативата значително влијаела на обемот на товарниот транспорт и оптимизацијата во логистиката што овозможува пониски трошоци за транспорт.
Гуо Жушуе, претседател на „Чајна релвеј груп“, истакна дека преку меѓународна соработка е подобрена и организацијата на транспортот.
– Во споредба со претходните години, вкупниот индикатор на товар за контејнерите на ЦРE достигна 100 отсто, а тарифите за превоз на домашни и меѓународни рути се намалени за повеќе од 40 отсто. Ова ефикасно ги намалува трошоците поврзани со меѓународната логистика – рече Жушуе.
Возовите на Кинеската железница реализирале речиси 120.000 патувања, создавајќи опсежна транспортна мрежа што поврзува 128 града во Кина со 232 града во 26 европски држави и повеќе од 100 града во 11 азиски земји. Овие статистики ги истакнуваат растот на ЦРЕ и нејзината суштинска улога во глобални рамки.
На вториот Форум беше претставена визијата за иднината на меѓународниот железнички транспорт, обезбедувајќи тој да остане камен-темелник на глобалната трговија и соработка. Говорниците на Форумот се согласија дека партнерствата формирани на овој настан веројатно ќе го отворат патот за натамошен напредок и трансформација во железничката индустрија, симболизирајќи ја динамичната интеракција помеѓу трговијата и поврзаноста на континентите.
Весна Дамчевска, наша известувачка од Кина
