Нова извршна наредба на претседателот на САД
Американскиот претседател Доналд Трамп деновиве потпиша извршна наредба со која им се забранува влез на граѓани од 12 земји. Имено, на листата се наоѓаат седум африкански земји (Чад, Конго, Екваторијална Гвинеја, Еритреја, Либија, Сомалија, Судан), четири азиски (Авганистан, Мијанмар, Иран и Јемен) и една северноамериканска (Хаити).
Делумно ограничен влез за граѓани од уште седум земји
Покрај тоа, влезот на граѓани од седум други земји – Бурунди, Куба, Лаос, Сиера Леоне, Того, Туркменистан и Венецуела, ќе биде делумно ограничен.
– Претседателот Трамп го исполнува своето ветување да ги заштити Американците од опасни странски актери што сакаат да влезат во нашата земја и да им наштетат – изјави портпаролката на Белата куќа, Абигејл Џексон.
Белата куќа објави дека „забраните ги погодуваат оние земји што претставуваат висок безбедносен ризик за САД“.
Трамп направи сличен потег во својот прв мандат, кога објави забрана за влез на патници од седум земји со муслиманско мнозинство. Но таа одлука беше поништена од поранешниот претседател Џо Бајден во 2021 година, нарекувајќи ја „дамка врз совеста на американската нација“.
Вашингтон: Екстремните опасности од странски државјани што не се соодветно проверени
Белата куќа соопшти дека ова „ограничување со здрав разум“ е донесено за да се „заштитат Американците од опасни странски актери“.
Во видео објавено на неговата платформа Трут соушл, Доналд Трамп рече дека неодамнешниот наводен терористички напад во Болдер, Колорадо, „ги истакнал екстремните опасности“ што ги носат странските државјани што не се „соодветно проверени“.
Дванаесет лица беа повредени во Колорадо во неделата кога маж нападна група собрана во поддршка на израелските заложници, фрлајќи две запаливи направи и користејќи импровизиран пламенофрлач. Осомничениот за нападот е идентификуван како египетски државјанин. Сепак, Египет не е меѓу земјите опфатени со забраната.
Исклучоци од егзекутивната наредба на претседателот на САД
Постојат голем број луѓе од земјите засегнати со забраната, кои сè уште можат да влезат во САД благодарение на следниве исклучоци:
– Спортисти што патуваат за големи спортски настани, како што се Светското првенство во 2026 година или Олимписките игри во 2028 година.
– Носители на „имигрантски визи за етнички и религиозни малцинства што страдаат од прогон во Иран“.
– Авганистански државјани со специјални имигрантски визи.
– Секој „законски постојан жител“ на Соединетите Американски Држави.
– Двојни државјани што исто така имаат државјанство на земја што не е опфатена со забраната за патување.
Покрај тоа, државниот секретар може да одобри исклучоци за поединци „од случај до случај“ ако „поединецот служи на националниот интерес на Соединетите Американски Држави“. Р.С.
