Министерството за одбрана на Русија соопшти дека украинските вооружени сили повеќе пати го прекршиле велигденското примирје што вчера го прогласи рускиот претседател Владимир Путин.
„И покрај најавата за велигденското примирје, единиците на вооружените сили на Украина во текот на ноќта се обидоа да ги нападнат позициите на руските војници во областите на населбите Суха Балка и Богатир во Доњецката Народна Република, но овие напади беа одбиени“, се наведува во соопштението од Министерство.
Дополнително, во текот на ноќта, според истиот извештај, украинската страна користела 48 беспилотни летала, меѓу кои и едно кое дејствувало на територијата на Крим.
Претходно, украинскиот претседател Володимир Зеленски денеска ја обвини Русија дека создава „привид на почитување на велигденскиот прекин на огнот“, велејќи дека Москва продолжи со нападите во текот на ноќта откако рускиот претседател Владимир Путин објави еднострано привремено примирје во Украина.
„На Велигденското утро можеме да констатираме дека руската армија се обидува да создаде општ впечаток за прекин на огнот, додека во некои области продолжува со изолираните обиди за напредување и нанесување загуби на Украина. Русија мора целосно да ги почитува условите на прекинот на огнот“, напиша тој на Телеграм.
Тој додаде дека предлогот на Украина за спроведување и продолжување на примирјето за 30 дена од полноќ останува на маса.
Зеленски понатаму изјави дека имало 59 случаи на руско гранатирање и пет напади од руски единици.
„Во областа Курск, руските сили извршија артилериски напади и користеа беспилотни летала. Секаде нашите борци одговараат како што заслужува непријателот, врз основа на специфичната борбена ситуација. Украина ќе продолжи да дејствува реципрочно“, напиша украинскиот претседател.
Зеленски во посебна објава на сите христијани им го честита Велигден, наведувајќи дека „злото може да има свој час, но Господ ќе има свој ден“ и дека порано или подоцна злото ќе се повлече и животот ќе победи.
