Гостивар
Општина Гостивар и Општина Гњилане ќе соработуваат со цел зајакнување на прекуграничната соработка во областа на заштитата на животната средина и одржливиот развој. Соработката е потврдена по заедничката средба на градоначалниците на двете општини, при што е постигнат договор за заедничка имплементација на проект финансиран од програмата ИПА 3, кој има цел подобрување на еколошката одржливост, намалување на влијанието на климатските промени и зголемување на квалитетот на животот на граѓаните во двете општини.
Главните активности во рамките на оваа иницијатива вклучуваат развој на зелена и еколошки прифатлива инфраструктура. Општина Гостивар ќе започне транзиција од традиционалните системи за греење со фосилни горива кон употреба на топлотни пумпи, со што ќе се намали загадувањето на воздухот. Во меѓувреме, во Општина Гњилане ќе се создадат урбани зелени површини со цел подобрување на квалитетот на воздухот и животната средина.
Соработката претставува значаен чекор кон одржлив развој и регионална соработка.
– Овој проект е доказ за нашата посветеност кон почиста и поздрава иднина за нашите граѓани. Соработката со Гњилане ќе донесе реални промени во квалитетот на животот и ќе воспостави успешен модел за прекугранична соработка – велат од Општина Гостивар.
Од Општина Гњилане ја истакнуваат важноста на заедничките проекти за заштита на животната средина и подобрување на животните услови.
Заедничкиот проект „Гостивар-Гњилане“ е важна иницијатива во рамките на програмата ИПА 3, која ја рефлектира визијата на двете општини за позелена и поодржлива иднина за прекуграничниот регион. Неговата имплементација се очекува да започне наредните месеци, со директни придобивки за локалните заедници.
