Европскиот центар за превенција и контрола на болести (ЕЦДЦ) будно ја следи состојбата по трагичниот пожар во ноќниот клуб „Пулс“ во Кочани, Македонија. Многу пациенти со повреди од изгореници се префрлени во болниците низ земјите-членки на ЕУ и соседните земји за итна медицинска помош.
ЕЦДЦ го истакнува ризикот од инфекции кај пациенти со изгореници од пожарот во Северна Македонија предизвикани од бактерии отпорни на карбапенеми, група на антибиотици од последна линија.
– Изгорените рани често се колонизирани од грам-негативни бактерии, како што се Pseudomonas aeruginosa, Acinetobacter spp. и Enterobacterales, вклучително и Klebsiella pneumoniae; кои често се отпорни на повеќе антибиотици, вклучително и карбапенеми, и кои можат да се шират во здравствените установи. Бактериите отпорни на карбапенем (CR) претставуваат сериозна закана за безбедноста на пациентите бидејќи инфекциите предизвикани од нив може да бидат многу тешки за лекување – наведува Центарот на својата веб страница.
Податоците од Македонија во 2023 година укажуваат на висока инциденца на CR бактерии, наведува ЕЦДЦ. Трансферот на пациенти преку границите, иако е неопходен, може да доведе и до ширење на CR бактерии. Во сличен пожар во ноќен клуб во Букурешт, Романија, во 2015 година, жртвите од изгореници развија сериозни бактериски инфекции со CR, што го нагласува овој ризик, посочува Центарот.
ЕЦДЦ препорачува болниците кои примаат пациенти од Македонија да спроведат мерки на претпазливост за да се спречи потенцијалното ширење на бактеријата CR. Тие вклучуваат изолирање на пациентите во еднокреветни соби веднаш по приемот или групирање на такви пациенти, скрининг за бактерии отпорни на повеќе лекови, вклучително и CR бактерии, обезбедување строга хигиена на рацете и чистење на околината и разумно користење на антибиотици.
– Исклучително важно е да се обезбеди повредените во пожарот да ја добијат најдобрата грижа, заедно со будноста во однос на ризиците за јавното здравје, отпорност на антибиотици. Здравствените системи кои преземаат соодветни мерки на претпазливост може да помогнат во заштитата на пациентите. ЕЦДЦ ги охрабрува земјите да споделат информации за сите случаи на бактерии со CR пронајдени кај пренесените пациенти за да поддржат координиран одговор – додава Центарот.
Во објавата на веб страницата, Центарот додава дека порастот на бактерии отпорни на повеќе лекови, вклучително и CR бактерии, е растечка закана за јавното здравје во Европа и ЕЦДЦ активно работи на тоа да се справи.
