Седницата на Народното собрание на Србија, на која се очекуваше претставниците да ја констатираат оставката на премиерот Милош Вучевиќ, продолжи откако беше прекината поради инциденти и судири, кога претставници на опозицијата фрлија димни бомби и солзавец во салата.
Седницата се одржува среде звуци на вувузели, свирежи и врева од пратениците од опозицијата, пренесе „Анадолија“.
Репортерката на „Ал Џезира“, претходно објави дека пратениците од опозицијата фрлиле димни бомби во Собранието и дека дошло до судир.
Според неа, во салата се зачадило, а биле фрлани и јајца. Истакнат бил транспарент на кој пишува „Србија се крева за да падне режимот“, како поддршка на студентските протести по уривањето на настрешница во Нови Сад, при што загинаа 15 лица.
Претседателката на српскиот парламент Ана Брнабиќ исто така објави дека „шок бомба“ ја погодила пратеничката Јасмина Обрадовиќ, која доживеала „мозочен удар и се бори за живот“ а додаде дека меѓу повредените е и пратеничката Соња Илиќ која е во осмиот месец од бременоста и дека лекарите се борат за неа и за бебето.
Агенцијата „ФоНет“ пренесе дека по усвојувањето на дневниот ред околу 11.15 часот настанала гужва и пукање на димни бомби во Собранието на Србија, а собраниската сала набрзо била покриена со чад.
Пратеничките групи на опозицијата изјавиле дека претставниците на опозицијата сметаат дека „Владата паднала“ и дека Брнабиќ „се обидува да воведе министри од Владата што паднала во комората“.
Тие предложија денеска на дневен ред да биде само една точка – за измени на Законот за високо образование.
Брнабиќ истакна дека седницата на Собранието ќе продолжи бидејќи „Собранието мора да ја работи работата за која е одговорно“.
Седницата на Народното собрание на Србија почна денеска, по тримесечна пауза, со предлог дневен ред од 62 точки, а на крајот, како што претходно рече Брнабиќ, пратениците треба да ја признаат оставката на премиерот Милош Вучевиќ, која ја поднесе на 28 јануари.
