ФУДБАЛ – ЛИГА НА ШАМПИОНИТЕ
Во петтото коло водечкиот го пречекува европскиот првак
Во петтото коло на фудбалската Лига на шампионите (ЛШ) неделава на програмата се неколку дерби-средби, меѓу кои и натпреварот утре Ливерпул – Реал Мадрид, дуел помеѓу водечкиот тим сезонава и актуелниот европски првак.
По четири кола без загубен бод е само Ливерпул, без пораз се и Спортинг, Монако, Брест, Интер и Аталанта, а Интер и Аталанта се и без примен гол. Од тимовите во кои настапуваат македонски интернационалци денеска Лајпциг на Елиф Елмас гостува кај Интер, утре Џирона на Бојан Миовски игра на гости со Штурм, а Динамо Загреб на Аријан Адеми и на Стефан Ристовски ја пречекува Борусија Дортмунд. Во осминафиналето ќе настапат првопласираните осум тима и победниците на дуелите во кои ќе играат екипите што ќе бидат од деветтото до 24-то место.
Двојки за денеска: Спарта – Атлетико Мадрид, Слован – Милан (двете од 18.45 часот), Баер – Салцбург, Јанг Бојс – Аталанта, Барселона – Брест, Баерн – Пари сен Жермен, Интер – Лајпциг, Манчестер сити – Феенорд, Спортинг – Арсенал (сите од 21 часот). Утре играат: Црвена звезда – Штутгарт, Штурм – Џирона (двете од 18.45 часот), Монако – Бенфика, Астон вила – Јувентус, Болоња – Лил, Селтик – Клуб Бриж, Динамо Загреб – Борусија Дортмунд, Ливерпул – Реал Мадрид, ПСВ Ајндховен – Шахтер (сите од 21 часот).
Табела: Ливерпул 12 бода, Спортинг, Монако, Брест и Интер по 10, Барселона, Борусија Дортмунд и Астон вила по девет, Аталанта осум, Манчестер сити, Јувентус, Арсенал, Баер, Лил, Селтик и Динамо Загреб по седум, Баерн, Реал Мадрид, Бенфика, Милан, Феенорд, Клуб Бриж и Атлетико Мадрид по шест, ПСВ Ајндховен пет, Пари сен Жермен, Спарта Прага, Штутгарт и Шахтер по четири, Џирона и Салцбург по три, Болоња еден, Лајпциг, Штурм, Јанг Бојс, Црвена звезда и Слован Братислава без бодови. Н.М.
Италија годинава освои двојнакруна во тенис
Италија годинава ги освои двете титули за репрезентации во тенис, откако по триумфот на женската селекција во купот Били Џин Кинг, во неделата победи и машката репрезентација, во Дејвис-купот. Двете натпреварувања се одиграа во Малага (Шпанија).
За тенисерките на Италија (во финалето ја победија Словачка со 2-1) тоа беше петти триумф во тоа натпреварување, прво по 11 години. Тенисерите, пак, ја освоија трета титула (во дуелот за трофејот ја совладаа Холандија со 2-0), но со победата ја одбранија титулата освоена лани. Машката селекција на Италија е првата што освои две титули во низа во Дејвис-купот, по успехот на Чешка во 2012 и во 2013 година.
Купот Били Џин Кинг се игра од 1963 година (годинашното издание беше 61.), а Дејвис-купот од 1900 година (досега се одржани 112 турнира). Во двете натпреварувања најтрофејни се репрезентациите на САД, со 18 титули во женска и 32 во машка конкуренција. Н.М.
