Руската приватна воена компанија „Вагнер“ почна да ги повлекува своите единици од украинскиот град Бахмут и да ги префрла освоените позиции на редовните руски трупи, јавија британските медиуми, повикувајќи се на денешна видео изјава на нејзиниот основач Евгениј Пригожин.
-Ги повлекуваме нашите единици од Бахмут. Од денеска во 5 часот, на 25 мај, до 1 јуни, повеќето единици ќе бидат прераспоредени во задните кампови. Ги предаваме нашите позиции на војската – објави основачот на Вагнер.
Видеото беше поставено на каналот Телеграм од неговата прес-служба и на неа Пригожин е прикажан во борбена опрема како стои до станбена зграда оштетена од војната.
Тој во саботата го соопшти заземањето на Бахмут по најдолгата и најкрвавата битка во оваа војна.
Во својата најнова видео изјава, основачот на Вагнер, кој постојано јавно ги критикуваше високите руски одбранбени функционери, кажа дека неговите сили ќе бидат подготвени да се вратат во Бахмут доколку редовната армија не може да се справи со ситуацијата.
Инаку, во долго интервју со воениот провоен блогер Константин Долгов, Пригожин тврди дека војната спектакуларно се вратила со неуспехот да ја „демилитаризира“ Украина, една од главните цели на претседателот Владимир Путин. Тој повика и на тоталитарна политика.
-Ние сме во ситуација кога едноставно можеме да ја изгубиме Русија. Мораме да воведеме вонредна состојба. За жал… мораме да објавиме нови бранови на мобилизација, мораме да ги ставиме сите што можат да работат да работат на зголемување на производството на муниција. Русија треба да живее како Северна Кореја неколку години, така да се каже, да ги затвори границите… и да работи напорно – рече Пригожин.
Наведувајќи го гневот на јавноста поради луксузниот начин на живот на руските богаташи и моќници, Пригожин предупреди дека во нивните домови би можеле да упаднат луѓе со „вили“. Тој ја издвои Ксенија Шојгу, ќерката на министерот за одбрана Сергеј Шојгу, која беше забележана на одмор во Дубаи со нејзиниот вереник Алексеј Столјаров, кој е фитнес блогер.
Пригожин, кој заработи богатство и прекарот „Готвачот на Путин“ благодарение на владините договори за угостителство, имаше улога во војната во Украина, најпрво распоредувајќи ги своите платеници на првите линии, а подоцна и големите регрутации од затворите за да ги зајакне ослабените сили на Москва. Пригожин во едно интервју изјави дека не знае да готви и дека новинарите требало да го нарекуваат „касапот на Путин“.
