ФУДБАЛ
- Имам иста енергија како и првиот ден, ист ентузијазам и среќен сум што можам да продолжам, рече Скалони, кој првично ја презеде функцијата на привремена основа во 2018 година, пренесе АП
Селекторот на фудбалската репрезентација на Аргентина, Лионел Скалони, го обнови договорот до 2030 година, ставајќи го на добар пат да стане првиот селектор што ќе ја предводи Аргентина на три светски првенства, пишува агенцијата „Асошиејтед прес“ (АП). Скалони ја предводеше Аргентина до титулата на Светското првенство во 2022 година и до второто место годинава. Неговиот претходен договор требаше да истече во декември.
– Откако малку размислив и разговарав со мојот тренерски персонал и блиските, решивме дека продолжувањето е најдобриот пат напред. Многу брзо постигнавме договор. Имам иста енергија како и првиот ден, ист ентузијазам и среќен сум што можам да продолжам – рече Скалони, кој првично ја презеде функцијата на привремена основа во 2018 година, пренесе АП.
Претседателот на Аргентинската фудбалска асоцијација (АФА), Клаудио Тапија, рече: „Ова е најдобриот исход за аргентинскиот фудбал; тоа е нешто што сите го сакаа, нешто што сите го сакавме“.
Скалони потврди и дека никој нема да го носи дресот со број 10 на Лионел Меси на претстојните пријателски мечеви со Уругвај и со Костарика, првите натпревари на Аргентина по официјалното пензионирање на Меси.
– Не сме одлучиле кому да му го дадеме и нема да го сториме тоа додека не стане задолжително. Кога ќе се случи тоа, ќе видиме кој ќе го добие. Кога конечно ќе одлучиме, се надеваме дека тоа ќе биде постојано, не сакаме да им го предаваме бројот 10 на различни играчи. Кога ќе го доделиме, се надеваме дека ќе му припадне на играч што навистина може да го направи свој – рече Скалони, пренесе АП.
Н.М.
