Државната матура ќе се спроведе во утврдените термини – на 27 мај и 10 јуни. Синдикатот на Државниот испитен центар (ДИЦ) вчера одлучи штрајкот за повисоки плати, почнат пред речиси три недели, да го стави во мирување во интерес на матурантите. Одлуката ја донел зашто смета дека со вклучување надворешни лица во подготовките на завршниот испит, како што најави МОН, ќе се наруши валидноста на тестирањето и резултатите од матурата.
-Како експерти во областа и лица со висок интегритет и чувство за општествена одговорност, вработените во Државниот испитен центар одлучија да ја одложат борбата за своите права за достоинствен живот во корист на вашата иднина. Со ова известување штрајкот се става во мирување – соопшти синдикатот на 29-те вработени во ДИЦ во порака до матурантите.
Министерот за образование и наука Јетон Шаќири најави дека државна матура ќе има според утврдениот календар и дека ќе бидат вклучени и вработени од Министерството за да се спроведе во рокот.
Според синдикатот на ДИЦ, „насилни мерки и притисоци“ е обидот на министерот „да внесе надворешни лица во процесот на државната матура кој е со висок степен на тајност“ и дека со тоа токму тој ќе им наштети на матурантите зашто ќе се доведе во прашање веродостојноста на резултатите.
– Со Вашиот обид да реализирате матура без вклученост на вработените на ДИЦ, вие ќе бевте тој што ќе ги оштетеше матурантите – му порача Синдикатот на ДИЦ на ресорниот министер и оцени дека неговите обиди за решение на проблемот се спротивни на одредбите на Правилникот за процедури за тајноста на подготовката, печатењето, дистрибуцијата, чувањето и оценувањето на испитниот материјал, донесен од министер за образование и наука од 31 март 2014.
Можноста да вклучи вработени од МОН во подготовката на државната матура, Шаќири ја најави пред неколку дена во ТВ-гостување и ја повтори вчера во изјава за медиумите, дециден дека полагањето ќе почне во закажаниот термин.
-Мојот конечен став е дека државната матура ќе се полага на 27-ми, како што е предвидено според рокот. Ако е потребно, и кадар од Министерството ќе доставиме од понеделник за да може да ги завршиме работните задачи. Тоа не е само барање на министерот туку и на средношколците – рече Шаќири.
Додаде дека ги поддржува вработените на ДИЦ во нивните барања но, како што рече, „не можеме секогаш да ги поврзуваме важните процеси со некои барања“. Како и во други изјави претходно, порача дека треба да го почекаат општиот колективен договор како системско решение.
Синдикатот на ДИЦ го почна штрајкот на 25 април со барање за поголеми плати и согласност од Министерството за финансии за нивниот колективен договор и ги стопираше процесите за кои е надлежен ДИЦ, меѓу кои и полагањето на државната матура и меѓународното тестирањето на основците ТИМСС.
Дваесет и деветте вработени бараат повисоки плати кои не им се зголемени и по повторниот пораст на минималната плата, што довело до изедначување на платите за различни работни позиции. Речиси половина од нив, 11, примаат околу 20.100 денари, а советниците кои, како што велат, се стожерот на ДИЦ, добиваат плата од 26 илјади денари.
За државна матура во јунскиот испитен рок годинава се пријавени 15 620 матуранти. На 27 мај треба да се полага првиот екстерен испит – Мајчин јазик и литература кој е задолжителен за сите матуранти. На 10 јуни е закажан тестот од вториот екстерен испит. Тој е изборен и матурантите имаа можност да избираат меѓу седум предмети.
