Украинскиот претседател Володимир Зеленски денеска изјави дека не видел никаков кинески мировен план, но дека ќе ја поздрави средбата меѓу Украина и Кина, пренесуваат британските медиуми.
– Би сакале да се сретнеме со Кина – рече Зеленски за време на прес-конференцијата во Киев што ја одржа со шпанскиот премиер Педро Санчез, во пресрет на првата годишнина од руската инвазија на Украина.
Шефот на украинската дипломатија Дмитро Кулеба соопшти дека претходно неделава, за време на средба во Германија, неговиот кинески колега Ванг ги споделил со него „клучните елементи од кинескиот мировен план“.
– Очекуваме дека ќе го споделат целиот текст на мировниот предлог со нас, бидејќи тоа не е нешто за што можете да донесувате заклучоци по разговорите – рече Кулеба.
Обраќајќи им се на новинарите синоќа во Њујорк на Генералното собрание на ОН, Кулеба рече дека Украина е „отворена за дискусии на оваа тема“.
– Подготвени сме да разговараме со оние кои имаат идеи кои можат да ни помогнат да ја постигнеме таа цел – изјави Кулеба. Но, украински функционер вчера предупреди дека ниту еден мировен план не треба да ги преминува „црвените линии“ поставени од Киев.
– Тие црвени линии се принципи на Повелбата на ОН и вклучуваат почитување на територијалниот интегритет на Украина. Нема преговори за ниту една украинска територија. Претседателот Зеленски тоа јасно го кажа во неколку наврати – додаде тој.
