Македонскиот автомобилист Марко Блажевски доминираше на патеката „Ред Бул Ринг“ во Австрија каде викендов се возеа две трки од Твинго купот, и со две победи го презеде водството во генералниот пласман во македонскиот шампионат.
Блажевски беше блиску и до триумф на втората трка во генерален пласман но, поради метежот на патеката од заостанати возила го загуби лидерското место.
За Блажевски ова е вторпат во кариерата да се искачи на подиумот во генерален пласман во ова натпреварување каде сезонава настапуваат над 30 возачи од неколку земји.
– Имав одличен викенд и штета е што не победив. Во над 70 отсто од трката бев во водство, но поради гужва од заостанатите возила на еден свиок бев престигнат. Но, сега сите добро ме запознаа и мене и другите возачи од Македонија и на следните трки сигурно ќе бидеме уште подобро пласирани – изјави Блажевски.
На подиумот се искачија и Владимир Тренески кој беше второпласиран и Ангелче Стојковски кој го освои третото место.
Следната трка се вози на 23 и 24 јули во Хрватска на патеката „Гробник“.
