Украина нема да прави компромиси за својот територијален интегритет во преговорите со Русија, но е подготвена да преговара за модел според кој нема да биде членка на НАТО во иднина, изјави за Фокс њуз Давид Арахамија, еден од украинските преговарачи.
Украина бара членство во Европската унија и НАТО, на што Москва се противи. Рускиот претседател Владимир Путин изјави дека можноста за членство на Украина во НАТО е доказ дека НАТО врши агресија против Русија.
– Одговорот што го добиваме од земјите на НАТО е дека тие не се подготвени ни да преговараат за нашето членство, барем не во следните пет до десет години. Подготвени сме да преговараме за не-НАТО модел. На пример, би можеле да добиеме директни гаранции од различни земји, како што се САД, Кина, Велика Британија и можеби Германија и Франција. Подготвени сме да разговараме со поширок опсег на земји, не само билатерално со Русија, туку со другите партнери – рече преговарачот Арахамија.
Не-НАТО модел (МННА) е име дадено од Соединетите Американски Држави на владите на блиските сојузнички земји кои имаат стратешки односи со вооружените сили на САД, но не се членки на НАТО. Нивниот статус не вклучува договор за взаемна одбрана со САД, но носи различни воени и финансиски предности кои инаку не се достапни за земјите кои не се членки на НАТО.
Аркахамија на својата Фејсбук страна потврди дека денеска продолжуваат преговорите меѓу Украина и Русија. На 28 февруари се одржаа првите руско-украински разговори во регионот Гомел во Белорусија. Вториот круг се одржа на 3 март во Беловежскај Пушча.
По една и пол недела војна, Украина и Русија се очекува да се сретнат на третата рунда преговори, за кои двете страни рекоа дека може да се одржат денеска. Локацијата и точното време на разговорите првично не беа соопштени.
Двете делегации последен пат се состанаа во регионот Брест во западна Белорусија на две рунди мировни преговори и се договорија да има хуманитарни коридори за градовите Мариупол и Волноваха за да се олесни евакуацијата на цивилите. Сепак, обидот за евакуација на Мариупол не успеа вчера, соопштија од Кремљ и Меѓународниот комитет на Црвениот крст (МКЦК). Русија и Украина ја разменија вината за непридржување кон договорениот прекин на огнот.
