Бугарија
Поранешниот бугарски претседател Росен Плевнелиев остана без својот џип БМВ, откако крадци го украдоа од трговски центар во Софија, каде што на паркинг го паркирала неговата сопруга Десислава Банова.
– Во саботата, околу 16 часот, се паркирав на нивото -1. Се вртев затоа што не најдов место за паркирање. Имам опција да го заклучам автомобилот автоматски откако ќе излезам од него. Се уверив дека го слушнав сигналот дека автомобилот е заклучен. Сепак, јас зборував на телефон и кога се приближив до лизгачката врата, еден човек со огромен ранец на грбот ме турна мошне арогантно. Можеби и побрзо ќе реагирав бидејќи имав слушнато за таква шема. Се сомневав бидејќи влегувајќи во трговскиот центар повеќе не го видов истиот тој – изјави Банова за Нова ТВ.
Таа се вратила назад, кога го здогледала мажот како тргнува кон нејзиниот автомобил. Следното нешто што Банова го видела е како автомобилот се оддалечува од паркингот, управуван од друго лице.
– Колку што разбрав, туркајќи се во мене, тој се обидува да го пресретне сигналот на клучот со уред што се наоѓа во неговиот ранец. Уште едно лице што стои до автомобилот без проблем влегува и излегува од него. Уште од првата минута ја известив 112 за кражбата – додаде сопругата на Росен Плевнелиев.
Кражбата е снимена од безбедносните камери лоцирани на паркингот. Крадците се толку искусни и имаат висококвалитетна опрема што за неколку минути успеваат да го придушат сигналот од ГПС-системот за следење на автомобилот.
Последната точка каде што Банова го видела својот автомобил бил на обиколницата, во близината на Горубијане. Излегува дека овој трговски центар е мошне префериран од крадците, бидејќи бариерите на паркингот се секогаш подигнати, а оттаму се излегува на обиколницата, каде што нема семафори и се бега со поголема брзина.
– Целосен апсурд е што ова се случува четврти пат, целосно неказнето и најверојатно од истата криминална група – рече Банова.
Бугарското МВР и Обвинителството соопштија дека е во тек истрага. Само за еден месец од паркингот на истиот трговски центар се украдени уште три автомобили.
