Според податоците на Транспаренси интернешнл
Индексот на перцепција на корупција на Транспаренси Интернешнл (ЦПИ) за 2020 година ги рангира Македонија и Босна и Херцеговина (БиХ) меѓу земјите во светот каде состојбата на корупција се влошува. Двете балкански земји се најдоа на 111 место на листата од вкупно 180 земји, позиција којашто ја делат заедно со Панама и со Монголија. Земјава бележи пад од осум места во споредба со состојбата во 2012 година.
Македонија е најлошо рангирана во регионот, со 35 бодови. Словенија има најдобра позиција во регионот со 60 бодови, а потоа следуваат Хрватска – 47, Црна Гора – 45, Србија – 38 и Косово со 36 бодови. Најдобри на глобално ниво според Индексот на перцепција на корупцијата се Данска, Нов Зеланд, Финска и други западни земји со висок степен на демократија. Земјите погодени од војна, беззаконие и диктатура се најдолу на листата, а годинава меѓу нив се најдоа Сирија, Сомалија и Јужен Судан.
Според извештајот пандемијата на ковид-19 ја одбележа изминатата година, но и целосно го разоткри најтемното лице на корупција, чија цена граѓаните за жал ја плаќаат со својот живот. Институциите парализирани од корупцијата му дадоа приоритет на бескрупулозниот грабеж на јавни средства, на штета на обезбедувањето соодветна здравствена заштита.
