Умни стихови на писателот Стојан Тарапуза (6)
Драги деца, во „Колибри“ можете да ја читате новата рубрика „Јатки на мудроста “, умните мисли на познатиот македонски писател за деца Стојан Тарапуза. Ова се стихови што замислуваат, подучуваат, разбиструваат многу дилеми во вашите глави.
Еве што вели за нив авторот:
„Ова се јатки од зборови со куќи и со дворови. Преполни се со духовен барут, секогаш цветен – никогаш штетен. Во нив живее мудроста. Царува вистината.
Се раѓаа спонтано. Доаѓаа како поплава. Ме понесуваа. Темите се различни. Пораките слични, сите до една добронамерни и хумани. Изразно се скржави. Мисловно – богати. Некои се и малку рогати! Зошто се такви, животот знае. Времето во нив и преде и ткае!“
Читајте ги овие мудри мисли секој вторник внимателно, размислувајте за нив, обидете се и самите да напишете некое умно слово. Тоа ќе ви помогне побрзо и полесно да растете и да го разберете, понекогаш чудниот свет на возрасните.
За авторот
Стојан Тарапуза е роден на 29 декември 1933 година во Злетово. Основно образование завршил во родното место и во Штип, а Средно техничко училиште и Виша педагошка академија во Скопје, каде што и денес живее. Речиси целиот работен век го помина како новинар и уредник во редакцијата Емисии за деца на МРТ. Член е на Друштвото на писателите на Македонија од 1966 година.
Како автор дебитира со стихозбирката за возрасни „Црвено растење“ во 1961 година. Напишал дваесетина книги за деца, меѓу кои се и „Грејни сонце“, „Дамбара думбара“, „Под стреата на ѕвездите“, „Поглед низ двоглед“, „Зборови по дворови“, „Шарки жарки“, „Брзалки без врзалки“, „Сон на тркала“, „Мудрословија“, „Разденица“, „Везеница“….
Застапен е во повеќе антологии, а негови песни досега се преведени на: руски, полски, чешки, словачки, романски, српски, хрватски и словенечки јазик.
Добитник е на повеќе награди и признанија, меѓу кои се и: наградата „13 Ноември“ на Град Скопје, наградата „Ванчо Николески“ што ја доделува ДПМ за најдобра книга за деца во 2015 г., а трипати го добил признанието на Радио-телевизија Скопје за своето творештво.
Застапен е во читанките и во училишната лектира, а во 2011 година „Просветно дело“ ги објави неговите собрани дела во три тома.
1.
Некој некогаш некаде рекол:
животот е вистински пекол.
Од работа не можеш ни да седнеш,
ни кога сакаш да си легнеш…
Така рекол и уште по првиот чекор,
од сенката добил опомена и прекор.
2.
Некој мати,
некој бистри,
– сите не сме исти.
3.
Ги пречекавме гостите,
– и културните и простите.
Без нив сега мачно ни е,
– самотата во нас гнездо вие.
4.
Животот е игра,
играчи сме ние,
битката за престиж
секој сам си ја бие.
5.
Да сме на чисто:
– да имаш и да немаш
не е исто.
Стојан Тарапуза
