Французинот Алексис Пинтуро забележа победа во паралелниот велеслалом во машка конкуренција на Светскиот куп во алпско скијање во Лех (Австрија). Во финалето тој го победи Хенрик Кристоферсен од Норвешка, со вкупна разлика по двете трки од 11 стотинки.
За Пинтуро (29) тоа беше 30-та победа во Светскиот куп и стана првиот алпски скијач што победил во шест различни дисциплини (во слалом, велеслалом, супервелеслалом, алпска комбинација, паралелслалом и паралелвелеслалом). Кај жените такво нешто ѝ успеало на Американката Микаела Шифрин.
Со 30-от триумф, Пинтуро се искачи на 10.а позиција според бројот на победи во СК. Најуспешен и понатаму е Швеѓанецот Ингемар Стенмарк, со 86 победи.
– Не сум тука заради бројките, тука сум за да се забавувам, за да победувам. Скијав навистина добро, тоа е најважното за мене – рече Пинтуро, освојувачот на три олимписки медали, сребро и две бронзи.
Во паралелните трки се натпреваруваат по двајца скијачи, еден до друг, на идентични, скратени патеки за велеслалом. Тие се тркаат на двете патеки, наизменично, а победува тој што има подобро збирно време.
По трката во саботата, Пинтуро води во генералниот пласман со 150 бода, пред Кристоферсен со 125, Лукас Братен од Норвешка со 113 итн. Во Светскиот куп следуваат два велеслалома во Санта Катерина Валфурва (Италија), викендов.
НАЈМНОГУ ТРИУМФИ ВО СВЕТСКИОТ КУП
СКИЈАЧ ЗЕМЈА ПОБЕДИ
Ингемар Стенмарк Шведска 86
Марсел Хиршер Австрија 67
Херман Маер Австрија 54
Алберто Томба Италија 50
Марк Џирардели Луксембург 46
Пирмин Цурбриген Швајцарија 40
Бенџамин Рајх Австрија 35
Аксел Лунд Свиндал Норвешка 36
Боди Милер САД 33
Алексис Пинтуро Франција 30
