Најдлабоко сочувство од редакцијата на „Нова Македонија“
- Има моменти кога зборовите се премали за да ја опишат болката, кога тагата е поголема од секоја реченица и кога единствено што можеме е со искрено срце да ја споделиме болката на оние што го изгубиле најмилиот
Трагичната несреќа на автопатот „Тракија“ во Бугарија длабоко нè потресе. Веста за загубените човечки животи и за десетиците повредени не е само уште една трагична информација. Нам ни е тоа добро позната болна човечка приказна за животи прекинати во еден миг, за семејства завиени во црнина, за најблиски кои денес се соочуваат со празнина што не може да се исполни и со болка за која нема утеха. Во овие тешки мигови, редакцијата на „Нова Македонија“ упатува најискрено и најдлабоко сочувство до семејствата, роднините и пријателите на загинатите. Ја споделуваме нивната тага и болка, свесни дека ниту еден збор не може да ја надомести загубата на родител, дете, сопружник, брат, сестра или пријател. На сите повредени им посакуваме сила, храброст и што побрзо закрепнување. Нашата поддршка е и со медицинските работници, спасувачите и сите оние што во овие часови се борат за секој човечки живот, помагајќи во околности исполнети со неизвесност и страдање. Ваквите трагедии нè потсетуваат колку е кревок човечкиот живот, колку малку понекогаш е потребно за еден обичен ден и обврски да се претворат во неповратна трагедија и колку е важно во моментите на најголема болка да не заборавиме на човечноста, блискоста и солидарноста. Иако границите ги делат државите, тие не можат да ја поделат човечката тага. Болката на семејствата во Бугарија е болка што ја чувствуваме и ние. Во вакви моменти, сочувството не познава граници, јазици или народи, туку постои само човечката потреба да се биде со оние што страдаат. На семејствата на загинатите им посакуваме сила да ја издржат оваа незамислива загуба, а на повредените успешно закрепнување. Нека почиваат во мир загинатите. Нека нивните најблиски најдат сила во љубовта, спомените и поддршката на оние што се покрај нив. Во оваа голема тага, нека знаат дека не се сами.
Со длабоко сочувство,
Редакција на „Нова Македонија“
