Тим лекари од Белата куќа денеска одржаа прес-конференција за да известат за здравствената состојба на американскиот претседател Доналд Трамп. Велат дека денеска е подобар, но досега на двапати имал пад на нивото на кислород.
– Како што е случај со сите болести, и кај Трамп има подеми и падови. Сепак, состојбата се подобрува и покрај падовите – рече докторот на Трамп, Шон Конли.
Друг член на тимот посочи дека Трамп не се жали на респираторни проблеми.
– Тој прими нова доза на Ремдесивир, без несакани ефекти. Трамп ја прими и првата доза на Дексаметазон вчера – рекоа лекарите.
Тие додадоа дека Трамп денес се движи и се чувствува добро.
Трамп беше пренесен со хеликоптер од Белата куќа во Валтер Рид, недалеку од Вашингтон, во петокот, околу 17 часот, откако објави дека е болен. Официјални лица во неговата администрација, кои потегот го опишаа како мерка на претпазливост, рекоа дека тој ќе биде задржан во болница неколку дена.
Висок службеник на американската администрација за Си-Ен-Ен во саботата изјави дека ширењето на коронавирусот меѓу високите републикански функционери можеби почнало на собирот во градината на Белата куќа каде што беше објавена номинацијата на судијата Ејми Кони Барет за Врховниот суд.
