Василево
Општина Василево изврши уплата на средства на земјоделците од населените места Добрашинци, Нова Маала и Висока Маала, кои претрпеа штети од невремето што го зафати овој крај во јуни 2019 година. На сметките на едно правно и на 121 физичко лице, кои имаа пријавено и утврдено штета, уплатени се три милиони седумстотини четириесет и една илјада и четиристотини и педесет денари. Граѓаните веќе ги имаат уплатените средства на своите сметки.
– На седницата на Владата одржана на 10 февруари 2020 година е донесена одлука за одобрување средства од резервите на буџетот за 2020 година. Со оваа одлука на Општина Василево ѝ се доделени финансиски средства во висина од 3.741.450 денари. Овие средства се наменети како парична помош, во согласност со информацијата на Комисијата за процени и утврдување на висината на штетата од елементарни непогоди и извадокот од нацрт-записникот од седмата седница на Владата – информираат од Општина Василево.
