Камерниот оркестар на Музичката младина на Македонија „Саша Николовски-Ѓумар“ во рамките на „Охридско лето“ го одржа традиционалниот концерт со младите и талентирани солисти, виолинистката Софија Никоска и саксофонистот Иван Трајановски. Изведбата на младите уметници, како солистите, така и членовите на оркестарот, предизвика восхит кај присутните во црквата „Света Софија“, кои ги имаше од различни генерации. Концертниот репертоар беше составен од внимателно одбрана програма, како што тоа впрочем се прави секоја година специјално за учеството на фестивалот.
– Како што знае и публиката на „Охридско лето“ што доаѓа на нашите концерти, секоја година ние избираме различен стил односно програма. Годинава со маестро Олег Кондратенко, нашата екипа избра мошне интересна програма во која уживаа сите. Програмата ја започнавме со серенада од композиторот Макс Брух, потоа нашата виолинистка Софија Никоска настапи со Шуберт и продолживме со нова нечуена композиција од чешкиот автор Едуард Направник за да продолжиме со композиторот Хектор Вила-Лобос и концерт за камерен оркестар и алт-саксофон односно сопран-саксофон. Завршивме со „Паладио“ од Карл Џенкинс, композиција што досега сме ја изведувале само во еден мал дел, поточно само првиот став – вели претседателот на Музичката младина на Македонија, Александар Герасимовски.
Според него, сите композиции се праизведби на „Охридско лето“ и затоа концертот беше премиерен.
Музичката младина на Македонија веќе 33 години е дел од фестивалската програма на „Охридско лето“ и секоја година носи млади и исклучително талентирани млади уметници. Камерниот оркестар на Музичката младина на Македонија, пак, постои повеќе од 32 години и е основан како прв сегмент на Летниот музички камп на МММ во Охрид во 1986 година. Овој ансамбл е прв и единствен од ваков вид на просторите на Југоисточна Европа и е составен од студенти на Факултетот за музичка уметност во Скопје, но и гости музичари од други земји. Повеќе од 350 млади музичари биле дел од овој уникатен состав, кој низ годините се наметна во музичката јавност, не само како неопходност туку и како изведувачки состав со високи професионални квалитети.
