Претседателот на Украина, Владимир Зеленски, денеска потпиша декрет со кој се укинуваат претходните бројни забрани за посета на чернобилската „зона“ околу местото на катастрофалната несреќа со нуклеарниот реактор од 1986 година, со цел да се создаде зелен коридор за туристи.
-Треба на светот да му го покажеме Чернобил: научници, еколози, историчари и туристи, сите тие се добредојдени. Денес потпишав декрет, со кој ќе се отвори процесот на трансформирање на зоната на исклучување во една од новите точки за раст на Украина- рече Зеленски, а пренесе агенцијата „Тасс“.
Украинскиот претседател вети дека Чернобил наскоро ќе стане научно и туристичко место кое ќе биде симбол на новите слободи во Украина – без корупции и забрани, но и инвестирање во иднината.
-Прво ќе создадеме зелен коридор за туристите и ќе ги отстраниме предусловите и за најмала радијација- рече Зеленски, истакнувајќи дека во тој дел нема да има никакви забрани.
