По неколку години развој, компанијата „Вирџин галактик“ конечно е подготвена да им понуди на клиентите летови во вселената.
„Вирџин галактик“ официјално потврди дека ќе го направи својот прв комерцијален лет во вселената, наречен Галактик 01, на 29 јуни, а во оваа инаугуративна мисија ќе бидат вклучени тројца патници од италијанските воздухопловни сили и Националниот совет за истражување, кои ќе ги водат истражувањата за микрогравитација.
Компанијата веќе има планови за следните летови. Галактик 02 е закажан за почетокот на август и е резервиран за приватна екипа. Познато е дека „Вирџин“ ќе има месечни летови, но сѐ уште нема повеќе детали. Компанијата објави дека преносите од двата лета ќе бидат достапни на официјалната веб-страница.
Последниот преткомерцијален тест-лет, вкупно петти, „Вирџин“ го изведе во мај. Компанијата претходно беше принудена на голем број одложувања поради инциденти. Првиот тест на вселенското летало „Спејсшипту“ се одржа во 2013 година, но активностите беа прекинати по фаталната несреќа на „ИСС Ентерпрајс“. Тест-летовите продолжија до 2016 година, кога беше тестиран „ВСС Јунити“. „Вирџин“ конечно стигна до вселената во 2018 година, но мораше да почека до 2021 година за својот прв вселенски лет со екипаж. Тогаш основачот на компанијата Ричард Бренсон отпатува во вселената. Комерцијалните летови беа одложувани неколкупати, а авионот „ВМС Ив“, кој го носи вселенското летало „Спејсшипту“, во меѓувреме беше надграден.
Затоа, евентуалниот почеток на вселенските летови е исклучително важен за бизнисот на „Вирџин галактик“, бидејќи компанијата бележи загуби со години и изгуби повеќе од 500 милиони долари само во 2022 година. Комерцијалната услуга нема брзо да ги врати тие инвестиции иако билетот чини 450.000 долари, но компанијата ќе добие значителен извор на приход.
