- Под слоганот на заедништвото и врвната уметничка прецизност, концертите
понудија внимателно одбрана програма што ја рефлектира богатата ритамска и мелос-карактеристика на македонскиот и хрватскиот фолклор
Националниот ансамбл за народни игри и песни на Македонија, „Танец“, и хрватскиот национален професионален фолклорен ансамбл „Ладо“ уште еднаш ја потврдија својата репутација на вистински амбасадори на културното
наследство. Со двата последователни, целосно распродадени концерти во Битола и во Скопје, овие два реномирани состава приредија вистински визуелен и звучен спектакл што долго ќе се памети.
Под слоганот на заедништвото и врвната уметничка прецизност, концертите понудија внимателно одбрана програма што ја рефлектира богатата ритамска и мелос-карактеристика на македонскиот и на хрватскиот фолклор.
– Нашите уметници уште еднаш воодушевија со техничката беспрекорност, препознатливата машка тежина во игрите и емотивната изведба на вокалните солисти и оркестарот. Гостите од Хрватска се претставија со својот специфичен вокален израз, раскошните и автентични носии од различни хрватски региони и динамичните кореографии, кои ја маѓепсаа публиката. Првата станица беше Битола, каде што во преполната сала, публиката со громогласни аплаузи го наградуваше секое движење на сцената. Сличен, ако не и уште подинамичен ефект беше постигнат и на следниот концерт во Скопје, каде што салата ечеше од овации, а на крајот од настапот публиката со стоечки овации ги испрати уметниците назад зад сцената. Ова не беа обични концерти, ова беше празник за очите и душата. Кога на едно место ќе се спојат професионализмот, љубовта кон традицијата и синергијата меѓу два вакви гиганта, успехот е неминовен – информираат од „Танец“
Оваа заедничка соработка уште еднаш докажа дека фолклорот не познава граници и дека соработката меѓу „Танец“ и „Ладо“ е длабоко вкоренета во меѓусебна почит и долгогодишно пријателство. Концертите покажаа дека традиционалната уметност и понатаму има огромна и верна публика, особено кога се презентира на професионално ниво.
