Шумски пожар го зафати канадскиот град Јаспер, Алберта, еден од стотиците пожари што ги пустошат провинциите Алберта и Британска Колумбија додека пожарникарите се борат да ги спасат клучните објекти, како што е гасоводот „Трансмаунтајн пајплајн“, соопштија властите. Надвор од контрола низ целиот регион беснеат 433 пожари во Британска Колумбија и 176 во Алберта, од кои повеќе од десетина во областа Форт Мекмареј.
Нафтоводот, кој може да носи 890.000 барели нафта дневно од Едмонтон до Ванкувер, минува низ националниот парк во канадските карпести планини во близината на живописниот туристички град, од кој во вторникот мораа да бидат евакуирани околу 25.000 луѓе.
– Пожарникарите работат на спасување што е можно повеќе структури и на заштита на клучната инфраструктура, вклучувајќи ги и станицата за третман на отпадни води, комуникациските капацитети и цевководот „Трансмаунтајн“ – објави „Паркс Канада“.
Операторот на цевководот претходно изјави дека работи безбедно со гасоводот и дека поставил противпожарни прскалки како мерка на претпазливост. Канадскиот премиер Џастин Трудо рече дека неговата влада го одобрила барањето на Алберта за федерална помош.
– Веднаш распоредуваме ресурси на канадските вооружени сили, поддршка за евакуација и повеќе ресурси за итни пожари во провинцијата и ја координираме помошта за гаснење пожари и воздушен транспорт. Алберта, ние сме со тебе – напиша Трудо.
Градот и паркот, кои годишно привлекуваат повеќе од два милиони туристи, беа евакуирани во понеделникот вечер, кога властите проценија дека во паркот има 15.000 посетители.
