Деновиве излезе од печат книгата комплетно посветена на Скопје, „Варшава го исцртува Скопје“, од полската авторка Кинга Нетман-Мултановска. Станува збор за книга што фрла поглед на голем период од историјата на Скопје, од неговото историско освојување од Османлиите, сѐ до денешен ден, а главниот акцент е ставен врз огромната помош што полските урбанисти и архитекти несебично му ја даваат на Скопје по земјотресот. Инспиративно, филигрански изработено четиво од кое многумина скопјани ќе дознаат многу нешта што досега не ги знаеле за својот град.
Книгата е објавена со поддршка од Амбасадата на Република Полска во Скопје и Министерството за култура на Македонија.
Фасцинантната многуслојна книга е израз на страста и компетенцијата на авторката, која, пишувајќи за мисијата на варшавските урбанисти во Скопје и за судбината на Македонија, ја открива заборавената солидарност на Полјаците со Македонците, врската на Полска со Балканот.
– Оваа прекрасна публикација има уште една основна димензија: го прикажува европското наследство преку палимпсестот Скопје – местото каде што се вкрстуваат христијанството, исламот, јудаизмот и атеистичкиот хуманизам. Кинга Нетман-Мултановска раскажува за градот покрај Вардар како за своја мала татковина, зашто ѝ подарил нова перспектива за запознавање на себеси и на својата култура. Љубовта кон ова парче земја ме зарази и мене. Скопје е и наша судбина, наша Европа. Скопје сме ние – велат од „Бегемот“.
