Излезе од печат вториот број на списанието за литература, уметност и култура „Стремеж“ за 2021 г. Во рубриката Проза, читателите можат да ги прочитаат расказот „Стар коњак“ на Влада Урошевиќ и расказот „Коњак Ѕамбало“ на Венко Андоновски, кои се во многу интересен тематски спој, а исто така и кусите прози „Трактат за љубовта“ на Тихомир Јанчовски, „Исто или не“ на Габриела Стојаноска-Станоеска, како и извадокот од необјавениот роман „Потклек“ на Љупчо Петрески. Во рубриката Поезија, во вториот број на „Стремеж“ за 2021 година, се објавени нови песни од Ерол Туфан, Виолета Танчева-Златева, Митко Гогов, Слаѓана Атанасова и хаику-поезија од Васко Марковски. Во рубриката Препеви, преводи се застапени поезија од швајцарската писателка Илма Ракуза во препев на Никола Маџиров, песни од турскиот поет Зафер Јалчинпинар во препев на Филиз Мехметоглу и извадок од романот „Под површината“ на полската писателка Едита Њевинска, преведен од полски на македонски од Звонко Димоски.
Рубриката Критики, есеи, студии ги содржи освртите на Лидија Капушевска-Дракулевска за романот „Лебед“ од Ана Стојаноска, на Марија Ѓорѓиева-Димова за романот „Скриени желби, далечни патувања“ од Владимир Јанковски, на Фросина Пармаковска за романот „Трамонтана“ од Наташа Сарџоска, како и рецензиите на Сузана Ѓорѓиевска „Пет куси-куси критики за пет прилепски автора (Љубица Трајкоска, Божана Тренческа, Тони Павлески, Габриела Стојаноска-Станоеска и Љупчо Петрески)“. Во оваа рубрика се поместени и текстовите на Тодорка Балова и Иван Антоновски посветени на Блаже Конески и неговaта поезија. Рубриката Театар преку фрагментот „Могила“ го промовира драмскиот текст „Рокеришта“ на Сашо Блажески. Во рубриката Ликовна уметност, Каролина Мицеска се осврнува на творештвото на акварелистот Илија Миноски во текстот „Миноски-творец на мигот“.
Последната рубрика Ин мемориам е потсетување на песните, животот и делото на литературниот критичар, теоретичар и писател Атанас Вангелов, а го содржи и текстот на Иван Антоновски „Слово за професорот Вангелов“.
Центарот за култура „Марко Цепенков“ од Прилеп, со поддршка на Министерството за култура, го издава списанието „Стремеж“.
