Во израелски напад во Појасот Газа во текот на ноќта загина наш висок политички лидер, соопшти денеска Хамас. Во израелските акции во Појасот Газа се убиени уште 19 лица, меѓу кои и жени и деца.
Хамас соопшти дека Салах ал Бардавил, член на неговото политичко биро и на палестинскиот парламент, бил убиен во напад во близина на градот Кан Јунис, во кој била убиена и неговата сопруга.
Бардавил беше истакнат член на политичкото крило на Хамас, кој со години даваше интервјуа за медиумите. Израел минатата недела го прекрши примирјето со Хамас кога започна ненадеен бран воздушни напади во кои загинаа стотици Палестинци низ Појасот Газа.
