Повеќе од 20 земји се согласија за Марк Руте, кому му завршува мандатот како холандски премиер, да биде следниот генерален секретар на НАТО. Останува уште десетина земји да се изјаснат за предлогот, а потоа консензуално да биде изгласан предлогот за новиот шеф на НАТО
ХОЛАНДСКИОТ ПРЕМИЕР МАРК РУТЕ ОБЕЗБЕДИ ПОДДРШКА ОД ДВЕ ТРЕТИНИ ОД ЗЕМЈИТЕ НА НАТО ДА ЈА ПРЕДВОДИ ВОЕНАТА АЛИЈАНСА КАКО ГЕНЕРАЛЕН СЕКРЕТАР
Холандскиот премиер Марк Руте обезбеди поддршка од две третини од земјите на НАТО да ја предводи воената алијанса како генерален секретар, изјавија за „Политико“ двајца високи функционери на Алијансата, за кои реномираниот медиум се изјасни дека ќе ги цитира како анонимни извори.
– По многу интензивни рунди на дискусии меѓу сојузниците, сега сме во моментот кога над 20 сојузници на НАТО се подготвени да го поддржат премиерот Руте како следен генерален секретар – изјави претставник на НАТО, кој самиот побара да остане анонимен за да разговара за чувствителните внатрешни размислувања во Алијансата.
Официјалните лица рекоа дека Руте, кој води кампања за функцијата од ноември, е единственото име што го предложија 31 влада на Алијансата.
Според правилата на НАТО, генералниот секретар треба да се одлучи „со консензус“, што значи дека Руте сепак треба да ја добие поддршката од сите преостанати земји.
Официјалниот претставник рече дека дискусиите „не се конечни“, но додаде: „Зад неговата кандидатура се крие зголемен моментум“.
Според повеќе извори од Брисел, расте притисокот врз членките на НАТО да го одобрат Руте пред лидерскиот самит во Вашингтон во јули. Тој ќе го замени Јенс Столтенберг, кој е на чело на НАТО од 2014 година.
Амбасадорката на САД во НАТО, Џулијан Смит, минатата недела рече дека сојузниците треба да имаат цел „да го завршат процесот на селекција веројатно во првиот квартал од оваа календарска година“.
Друг висок претставник на НАТО го потврди бројот на земји што сè уште треба да го поддржат Руте, велејќи дека околу 10 сè уште се воздржуваат од гласањето за.
– Ќе продолжиме да ги слушаме нивните прашања и грижи. И ја охрабруваме… холандската мисија во НАТО да одговори на тие прашања – рече првиот функционер.
Земјите ја задржуваат својата поддршка од различни причини.
И „за“ и „против“…
Не е јасно дали балтичките земји го поддржуваат Руте, со оглед на нивното инсистирање на поголема политичка поддршка за патот на Украина за приклучување кон НАТО.
Естонската премиерка Каја Калас изрази интерес за највисокото место на НАТО за време на настанот организиран од „Политико“ во ноември. Но претставниците на НАТО велат дека таа не е во комбинација бидејќи не се изјаснила за својата кандидатура. Истото тоа важи и за министерот за надворешни работи на Летонија, Кришјанис Кариш, кој минатата година направи медиумска мини-турнеја за да ги провери своите изгледи во јавноста.
Според пишувањата, пак, на реномираниот медиум „Блумберг“, „Турција бара Руте да не ги фаворизира земјите од ЕУ во Алијансата“.
Понатаму, за издвојување е и дека Унгарија имаше долгогодишни несогласувања со Руте во врска со неговите остри критики за демократското назадување на земјата. Така што во месециве што претстојат, за Руте и неговите лобисти останува предизвикот десетина земји членки на НАТО да дадат согласност за Марк Руте како генерален секретар на НАТО.
