Заврши самитот на БРИКС во Јоханесбург, Јужна Африка
Самитот на БРИКС што се одржуваше изминатите три дена во Јоханесбург, Јужна Африка, заврши со покана до шест земји да му се приклучат на блокот од 2024 година
Самитот на БРИКС што се одржуваше изминатите три дена во Јоханесбург, Јужна Африка, заврши со покана до шест земји да му се приклучат на блокот од 2024 година. Информацијата дека е упатена покана до Аргентина, Египет, Иран, Етиопија, Саудиска Арабија и Обединетите Арапски Емирати да станат нови членки на блокот ја соопшти јужноафриканскиот претседател Кирил Рамафоса, за време на воведниот говор на третата сесија на 15-от самит на БРИКС, при што прецизира дека интеграцијата во блокот ќе биде ефективна од 1 јануари 2024 година.
Тој посочи дека е постигнат консензус за првата фаза од процесот на проширување, а потоа ќе следуваат и другите фази.
Покрај тоа, Рамафоса изјави дека сите сегашни членки се согласиле да ја поддржат конечната декларација за настаните – Декларацијата од Јоханесбург II.
Проширувањето на групата БРИКС следната година ќе биде второ, бидејќи на блокот, кој беше формиран во 2009 година од Бразил, Русија, Индија и Кина, една година подоцна му се приклучи и Јужна Африка.
Повеќе од 40 земји покажаа интерес за приклучување кон БРИКС, според јужноафриканските власти, а 22 официјално аплицираа за членство.
Според првите извештаи од Јоханесбург, меѓу главните критериуми за избор бил географскиот фактор. Овој избор беше направен за да се одржи регионалната рамнотежа во рамките на групата. Во согласност со овој принцип, сега се размислува за членство и на друга африканска земја.
Исто така, владата на Бразил би сакала да ја види Индонезија како членка на БРИКС, но земјата сè уште не е подготвена да ѝ се приклучи на оваа група, се наведува во извештајот. Некои извори ја споменуваат Индонезија како сигурна следна членка, но во моментов треба да заврши нејзиното претседавање со групацијата АСЕАН.
Групата формално им наложи на министрите за финансии и гувернерите на централните банки да го разгледаат прашањето за локалните валути, платежни инструменти и платформи и да ги известат лидерите на БРИКС до следното лето.
Во изјавите на заедничката прес-конференција, лидерите на земјите учеснички ги изнесоа своите ставови. Премиерот на Индија, Нарендра Моди, рече дека неговата земја ќе придонесе за градење консензус со другите земји што изразиле желба да се приклучат.
Претседателот на Кина, Си Џинпинг, пак, рече дека проширувањето на БРИКС е историско и нова почетна точка за соработката со БРИКС. Кинескиот претседател нагласи дека проширувањето ја одразува резолуцијата на земјите од БРИКС да се обединат и да соработуваат со другите земји во развој, ги исполнува очекувањата на меѓународната заедница и им служи на заедничките интереси на пазарите во развој и земјите во развој.
Рускиот претседател Владимир Путин рече дека прашањето за постигнување договор за обединета валута на БРИКС е „предизвикувачка задача“, но инсистираше на тоа дека блокот ќе работи на постигнување резолуција за ова прашање.
Во својот говор на самитот на БРИКС еден ден претходно, рускиот претседател изјави дека Москва е за проширување на употребата на локалните валути наместо доларот.
Домаќин на прес-конференцијата беше Рамафоса, а присуствуваа уште и бразилскиот претседател Луис Инасио Лула да Силва и индискиот премиер Нарендра Моди, додека рускиот претседател Владимир Путин учествуваше онлајн.
